Дьокуускайга «Көмүс мааска» национальнай бириэмийэ эксперэ кэллэ
«Көмүс мааска» Арассыыйа национальнай бириэмийэтин экспертэрин сэбиэтин чилиэнэ РФ култууратын үтүөлээх үлэһиттэрэ Матрена уонна Алексей Павловтар ааттарынан Үүнэр көлүөнэ тыйаатырыгар «Мин баар буолуохтаах хаартыскам» испэктээги көрө кэллэ.
Нуучча улуу суруйааччыта Виктор Астафьев айымньытынан «Мин баар буолуохтаах хаартыскам» испэктээк «Көмүс мааска» бириэмийэҕэ сүүмэрдиир түһүмэҕи ааспыт. Испэктээк сэтинньи 26, 27 уонна 28 күннэригэр күнүс 16:00 чаастан Үүнэр көлүөнэ тыйаатырын сценатыгар көрдөрүллэр. Режиссердар – Антон Ботаков уонна СӨ култууратын туйгуна Мария Иванова.
Виктор Астафьев автобиографическай хабааннаах кэпсээнин сахалыы тылбааһын СӨ норуодунай артыыһа Петр Андреев оҥордо, сценаҕа көрдөрүллэр көрүҥүн тылбааһа – Диана Сутакова, кытайдыы тылбаас –Мария Андреева, нууччалыы синхроннай тиэкис – Арассыыйа суруйааччыларын сойууһун чилиэнэ Ираида Попова.
«Мин баар буолуохтаах хаартыскам» («Фотография, на которой меня нет») испэктээк 90-с сылларга Саха сирин түҥ нэһилиэгин олоҕун көрдөрөр. Биир күн нэһилиэк баһылыгар төлөпүөнүнэн эрийэннэр, куораттан кытайдар кэлэллэр диэн иһитиннэрэллэр. Дьиҥнээх кытайдар! Өссө географтар! Сири-дойдуну үөрэтэр, кэрэ-бэлиэ миэстэлэри, эбиитин олохтоохтору хаартыскаҕа түһэрэн үйэтитэр соруктаахтар үһү!
Бу – дьиҥнээх доҕордоһуу, киһилии сиэрдээх быһыы туһунан испэктээк, диэн иһитиннэрэр Үүнэр көлүөнэ тыйаатырын пресс-сулууспата.
Сонуннар
Ордук ааҕаллар
