Айсен Николаев Тырааныспар нэдиэлэтин түмүгүн иһитиннэрдэ

Ил Дархан Айсен Николаев Москваҕа Тырааныспар нэдиэлэтин чэрчитинэн Суол федеральнай агентствотын, Росавиация, Росморречфлот салалталарын кытта көрсөн, өрөспүүбүлүкэ тырааныспарын инфраструктуратын соруктарын дьүүллэстэ. 

Ол курдук, «Магистральнай инфраструктураны модернизациялааһын уонна кэҥэтии кэлим былаана» нацбырайыагынан Саха сиригэр «Региональнай аэропортары сайыннарыы» федеральнай бырайыак үлэлиир. Айсен Николаев бэлиэтээбитинэн, бу бырайыак бастакы түһүмэҕэр киирбит 14 аэропортан 11-гэр үлэ түмүктэммит: Дьокуускайга, Черскэйгэ, Эдьигээҥҥэ, Хаандыгаҕа, Белай Гораҕа, Үөһээ Бүлүүгэ, Бүлүүгэ, Депутатскайга, Сангаарга, Нерюнгрига уонна Уус Ньараҕа. Хаалбыт үс аэропорка — Өлүөхүмэ, Полярнай уонна Мииринэй — үлэ 2025–2026 сылларга былааннанар. 
«Бу кэнниттэн Ньурба, Зырянка, Маҕан аэропортара уонна Полярнай иккис уочарата оҥоһуллуохтара», — диэн эбэн этэр Айсен Николаев. 
Ил Дархан бэлиэтээбитинэн, сорох эбийиэктэри тутуу болдьоҕун 2028-2030 сыллартан 2025–2026 сылларга көһөрөр туһунан кэпсэтиилэр барбыттар. 
Росморречфлот салайааччыта Андрей Тарасенконы кытта өрүс пордун баазатыгар Аллараа Бэстээххэ логистика киинин тэрийии уонна хоту улуустарга таһаҕаһы тиэйиини үбүлээһин иэнин улаатыннарыы туһунан кэпсэтии барбыт. 
Маны сэргэ өрөспүүбүлүкэ бырабыыталыстыбата Росморречфлот салалтатын кытта уу суолунан пассажирдары тиэйиини сайыннарыыга сөбүлэҥ түһэрсибиттэр. 
Суол федеральнай агентствотын кытта Өлүөнэ муостатын тутууттан саҕалаан, «Бүлүү», «Халыма» федеральнай трассаларга муосталары, атын даҕаны суоллары тутуу тула кэпсэтии барбыт. 
«Быйылгы ардахтар кэннилэриттэн үөскээбит балаһыанньа хатыламматын туһуттан, федеральнай суоллары көрүү-истии туһунан кэпсэттибит», — диэн бэлиэтиир Айсен Николаев.
«Куттала суох уонна хаачыстыбалаах суоллар» нацбырайыагы олоххо киллэрии боппуруоһа эмиэ болҕомто кииниттэн тахсыбатах.
«Суол федеральнай агентствотын кытта саҥа уонна Өлүөнэ муостатын тутуу курдук номнуо саҕаламмыт бырайыактар дойду бэрэсидьиэнэ олохтообут болдьоҕор олоххо киирэллэригэр бары кыахпытын уурарга сөбүлэстибит», — диэн бэлиэтээтэ өрөспүүбүлүкэ баһылыга. Ол туһунан Ил Дархан уонна Бырабыыталыстыба пресс-сулууспата иһитиннэрэр.