«Дьокуускай – үлэ албан аатын куората» хаартыска быыстапката ыалдьыттары күүтэр
Быыстапка аһыллыытыгар Саха Өрөспүүбүлүкэтин култуураҕа уонна духуобунай сайдыыга миниистирин солбуйааччыта Афанасий Ноев, куорат баһылыгын солбуйааччы Наталья Степанова, муниципальнай архыып дириэктэрин эбээһинэһин толорооччу Айталина Захарова, куорат Бэтэрээннэрин сэбиэтин бэрэссэдээтэлэ Николай Тряпша, ЯТЭЦ дириэктэрэ Вадим Андриевскай кытыннылар.
Муниципальнай архыып дириэктэрин эбээһинэһин толорооччу Айталина Захарова, быыстапка Куорат күнүн бэлиэтээһиҥҥэ анаммытын тоһоҕолоон туран, олохтоохтор архыып докумуоннарын нөҥүө төрөөбүт куораттарын уонунан сыллардааҕы, ону тэҥэ сэрии ыар сылларынааҕы историятын кытта билсэллэрин туһунан эттэ. Манна Аҕа дойду Улуу сэриитин кэмигэр Дьокуускай куорат олохтоохторун хорсун быһыыларын, килбиэннээх үлэлэрин туһунан кэпсиир элбэх докумуон, хаартыска баар. Былырыын дойду бэрэсидьиэнин Ыйааҕынан Дьокуускайга «Үлэ албан аатын куората» аат иҥэриллибитинэн бары киэн туттабыт. Ити – куорат олохтоохторун дьоруойдуу быһыытын уонна килбиэннээх үлэтин билинии уонна үрдүктүк сыаналааһын буолар.
Быыстапка 2023 сыл алтынньы 1 күнүгэр диэри үлэлиэҕэ.
Сонуннар
Ордук ааҕаллар
