Дьокуускай куорат үүнээйилэрэ пааспар ылыахтара

Киин куоракка бэс ыйын саҕаланыыта көҕөрдүү үлэтин былаана бигэргэтиллибитэ. Онно аан бастакы төгүлүн хас биирдии үүнээйи – мастар, сэппэрээктэр ахсааннара учуоттанан инвентаризация киириэхтээҕэ этиллэр. Куорат баһылыга Евгений Григорьев үүнээйилэри кытта үлэҕэ туспа муниципальнай салааны тэрийэр туһунан боппуруоһу быһаарар сорудаҕы биэрбит. 
Суол хаартатыгар уулуссалары, тиэргэннэри уонна общественнай миэстэлэри көҕөрдүү сурулла сылдьар. Көҕөрдүү үлэтин чэрчитинэн, общественнай миэстэлэри куорат предпринимателлэрэ туһаналларыгар биэрии былааҥҥа баар. Бизнес бэрэстэбиитэллэрэ атыы-эргиэн көһө сылдьар эбийиэктэрин туруоруохтарын сөп уонна территорияны көрөр-истэр, көҕөрдөр соруктаналлар. Маны сэргэ куорат олохтоохторугар анаан араас култуурунай тэрээһиннэри, кэнсиэртэри, быыстапкалары, маастар-кылаастары ыытыахтаахтар. Предпринимателлэргэ парклет диэн дьон дьыл кэмиттэн көрөн сынньанар кыракый сирдэрин тротуардарга оҥорорго этии киирдэ.  

Куорат уулуссаларыгар биир уонна элбэх сыл үүнэр үүнээйилэри олордуунан уонна инвентаризациянан территориальнай уорган салалтата дьарыктаныа. Инвентаризация уонна учуот ханнык үүнээйи төһө тулуйарын, кинилэри көрүү-истии хайдах барарын кэтээн көрүүгэ көмөлөһүөхтэрэ. Үүнээйи пааспарыгар ахсаана, суорда, ханна, төһө улахан территорияҕа үүнэн турара киириэ.   
Дьиэлэр тиэргэннэригэр көҕөрдүү үлэтин салайар тэрилтэлэр (УК) уонна олохтоохтор ыытыахтара. 
«Биһиги көҕөрдүү үлэтигэр олох саҥа сүүрээни киллэрдибит. Үүнээйибит тиийбэтэ – бу куораппыт сытыы кыһалҕаларыттан биирдэстэрэ, ол туһунан олохтоохтор сөпкө үҥсэллэр. Үүнээйилэри кытта үлэҕэ туспа муниципальнай салааны тэрийэр туһунан боппуруоһу быһаарыахпытын наада. Оччоҕо үүнээйилэрбитин хаачыстыбалаахтык, идэтийбит дьон көрүө-харайыа, үүнээйи үйэтин уһатыа этилэр», - диэн Евгений Григорьев нэдиэлэтээҕи планеркаҕа сорудах биэрэригэр эттэ. 
Быйыл куорат бүдьдьүөтүттэн көҕөрдүү үлэтигэр 11,5 млн солкуобай көрүллүбүт, онтон 7,2 млн солкуобайа территориальнай уорган салалтатыгар, 4,3 млн солкуобай «Куорат хаһаайыстыбатын үлэлэтэр сулууспа» МХТ бэриллибит.

«Куорат хаһаайыстыбатын үлэлэтэр сулууспа» МХТ информациятынан, бэс ыйын 8 күнүнээҕи туругунан, куорат территориятыгар 140 сэппэрээк уонна 771 мас олордуллубут. Күһүн 709 сэппэрээк уонна 727 мас олордуллара былааннаммыт. Куорат бүдьдьүөтүн суотугар 78 тыһыынча кэриҥэ сибэкки олордуллубут. Куорат тэрилтэлэрэ эбии 98 тыһыынча кэриҥэ сибэккини уонна 311 маһы олордуохтара.