Бука бары “Мир” картаҕа көһөбүт
Быйыл алтынньы 1 күнүттэн биэнсийэни, оҕо босуобуйатын уонна да атын социальнай төлөбүрдэри “Мир” төлөбүр систиэмэтигэр көһөрөллөр. Бу уларыйыы өссө от ыйыгар киириэхтээх этэ даҕаны, дьаҥ тарҕанан тохтотуллубута.
Visa, MasterCard карталарга биэнсийэ уонна социальнай босуобуйалар аны түспэттэр, судаарыстыбаттан ылыллар харчы аны “Мир” картаҕа эрэ түһэр. Онон оҥотторо илик буоллаххытына алтынньыга диэри баттаһыҥ!
“Мир” систиэмэ картатын ханнык баҕарар бааҥҥа оҥотторуохха сөп – Сбербанк, ВТБ, Россельхозбанк, Газпромбанк уо.д.а. Социальнай төлөбүрү ылыыга аналлаах карта үгүс бааннарга босхо оҥоһуллар.
“Мир” картаҕытын ыллаххытына булгуччу биэнсийэ пуондатыгар эбэтэр социлаьнай харысхал салаатыгар саҥа реквизиттэргитин биллэриэхтээххит. Реквизиттэри карта ылбыт бааҥҥытыгар тута биэрэллэр.
Дьокуускайга Нэһилиэнньэ социальнай харысхаллаах буолуутун киинэ Ленин пр. 4/1 баар. Бэйэ изоляциятын кэмигэр кими да иһирдьэ киллэрбэттэр эрээри, сайаапкаҕытын суругунан ааҥҥа турар дьааһыкка угуоххутун сөп.
Биэнсийэ пуондатыгар судаарыстыбаннай өҥөлөр порталларын нөҥүө биэнсийэни тиэрдиигэ уларытыылары киллэрии сайаапкатын толорон ыытаҕыт.
Оттон биэнсийэлэрин почтанан ылар уонна счекка түһэртэрэр дьоҥҥо уларыйыы киирбэт, уруккуларын курдук ылаллар.
Сонуннар
Ордук ааҕаллар
