Библиотекаларга сахалыы уонна иитэр суолталаах кинигэлэри тиксэрэллэр

Ил Дархан Айсен Николаев сорудаҕынан 2023 сылга култуурунай, сиэр-майгы сыаннастарын өрө тутар, ыччаты патриотическай иитиини күүһүрдэр уонна төрөөбүт тылы харыстыыр сыалтан хас биирдии муниципальнай библиотекаҕа 54 кинигэни биэрэр дьаһал сөргүтүлүннэ. Ол эбэтэр 501 муниципальнай библиотекаҕа уопсайа 27 тыһыынча кинигэ тиксэриллиэҕэ.
Маны сэргэ 500 оскуола библиотекатыгар 18-тыы устуука оҕо кинигэтэ түҥэтиллиэҕэ. 
Социальнай суолталаах кинигэлэри бастакынан Өлөөн улууһугар тиксэрдилэр.
«2020-2024 уонна былааннаах 2026 сылларга Саха Өрөспүүбүлүкэтигэр култуураны сайыннарыы» судаарыстыбаннай бырагырааманан социальнай суолталаах кинигэлэри бэлэмнээһиҥҥэ, тарҕатыыга сыллата субсидия көрүллэр. 2019-2021 сылларга бу сыалга сылга 16,25 мөл. солк. тыырыллан кэлбитэ, 2022 сылга – 20 мөл. солк., 2023 сылга – 20,8 мөл. солк., диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.