Бэс-Күөлүн 14 ыала саҥа дьиэлэригэр киирдилэр

Горнай улууһун Бэс-Күөл сэлиэнньэтин  «Кэскил» дьоҕус оройуонун саҥа дьиэлэрин тутуута түмүктэнэн эрэр. Алтынньы 9 күнүгэр үөрүүлээх быһыыга-майгыга саҥа тупсаран оҥоһуулаах дьиэлэр күлүүстэрин 14 ыалга туттардылар. Дьоҕус оройуоҥҥа билиҥҥи туругунан уопсайа былааннаммыт 34 дьиэттэн 20-тэ киирдэ. 
Дьиэ күлүүстэрин Саха сирин бырабыыталыстыбатын бэрэссэдээтэлин бастакы солбуйааччы Дмитрий Бердников туттарда. Кини санатан эппитинэн, инники алта дьиэ күлүүстэрин дьиэлэрин уонна хаһаайыстыбаларын баһаарга былдьаппыт ыалга балаҕан ыйын 28 уонна алтынньы 1 күннэригэр туттарбыттар. 
«Дьоҕус оройуон олохтоохторун кэтэһиилээх дьиэлэригэр киирбиттэринэн эҕэрдэлиэхпин баҕарабын. Төһө да кылгас болдьоҕун иһин, тутааччылар дьиэлэри тутууну уонна уулусса-суол ситимнэрин бэрээдэктээһини салҕыыллар, онно эбии олохтоохторго муҥутуур табыгастаах усулуобуйаны оҥороллор. Дьоҕус оройуоҥҥа гаас, уу киллэрдилэр, дьиэлэргэ септик туруордулар уонна билиҥҥи туругунан интэриниэт киллэриитэ түмүктэнэн эрэр. Кэлэр нэдиэлэҕэ «Кэскил» дьоҕус оройуону чөлүгэр түһэрии түмүктэниэҕэ», — диэтэ Бердников.
Кини тутааччыларга, волонтердарга уонна туора турбатах, Бэс-Күөл сэлиэнньэтин чөлүгэр түһэриигэ кыттыбыт өрөспүүбүлүкэ бары олохтоохторугар махталын тириэртэ. 
«Икки ый анараа өттүгэр манна кэлэн хас биирдии дьиэ кэргэни кытта көрсөн тутуу үлэтэ хайдах буолуохтааҕын дьүүллэспиппит. Бүгүн, олох кылгас кэм иһигэр 20 диэни тутан бүтэрдибит. Олохтоохтор күүппүттэрин толордубут, дьиэлэрэ сылаас уонна хаһаайыттарыгар уһуннук сулууспалыахтара диэн эрэнэбин», — диэтэ өрөспүүбүлүкэ тутууга миниистирэ Павел Кылатчанов.
Бэс-Күөл сэлиэнньэтин дьиэлэрин тутуутун сүрүн үбүлээччинэн Саха сирин Үүнэр көлүөнэтин целевой пуондата буолар. Генеральнай дириэктэр Владимир Егоров бэлиэтээбитинэн, бөһүөлэги чөлүгэр түһэриигэ АК «АЛРОСА» 200 мөл. солк., «Таас-Юрях Нефтегазодобыча» ХЭТ 25 мөл. солк. көмөлөрүн ыыппыттар.