Бэрэсидьиэн граныгар куонкурус үрдүк, сайаапка элбэх

2021 сылга Бэрэсидьиэн гранын пуондатын иккис куонкуруһугар биһиги өрөспүүбүлүкэбититтэн 240 сайаапка киирдэ. Онон Саха сирэ Уһук Илин федеральнай уокурукка инники күөҥҥэ таҕыста.  Бу туһунан СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.

Доруобуйа харыстабылын өйүүр, чөл олоҕу пропагандалыыр хайысхаҕа 44 бырайыак, култуура уонна искусство уонна науканы, үөрэхтээһини өйүүр аналлаах 33 бырайыак киирдэ. “Историческай өйдөбүнньүгү харыстааһын” хайысхаҕа – 32 бырайыак.   

2020 сыл иккис куонкуруһугар Саха сирэ 140 сайаапканы биэрбит буоллаҕына, быйылгы сылга лоп курдук 100 сайаапканан, ол эбэтэр 71  % элбэх.  

Горнай улууһа 32 сайаапканы биэрдэ, онон улуустар ортолоругар лиидэр аатын ылла. Хаҥалас 13, Амма 12, Нам 11, Чурапчы 10, Кэбээйи 7 сайаапкалаах. Оттон Мэҥэ Хаҥалас, Мииринэй, Нерюнгри, Ньурба улуустарыттан 6-лыы, оттон Дьокуускай куорат уокуругуттан 92 сайаапка киирдэ. Өлөөн уонна Аллайыаха улуустара бастакытын кытыннылар.

Куонкурус түмүгэ бэс ыйыгар тахсар. От ыйын 1 күнүттэн өйөбүл ылбыт бырайыактары үбүлээһин саҕаланыаҕа.