Бэрэбиэркэ түмүгэ: 110 эбийиэк, 14 аакта

Саҥа дьыл бырааһынньыктарыгар Дьокуускай куорат суһал штаба 110 эбийиэги бэрэбиэркэлээтэ. Ол түмүгэр 14 тэрилтэ ирдэбили тутуспата бэлиэтэннэ, 14 аакта толорулунна.

Административнай хамыыһыйа бэрэссэдээтэлэ Феликс Антонов иһитиннэрбитинэн, тохсунньу 4 – 9 күннэригэр анал бөлөх сэргэхситэр-аралдьытар тэрилтэлэргэ рейдэ ыыппыт. Уопсайа 110 эбийиэккэ бэрэбиэркэ барбыт, 14 тэрилтэҕэ кэһии баара бэлиэтэммит, аакта толоруллубут. Ол курдук, сорох эбийиэктэр 23.00 чаас кэннэ үлэлии турбуттара, ону таһынан көҥүлэ суох бэчэрииҥкэ ыытыллыбыта билиннэ.

«Сүрүн кэһиилэринэн дискотекалары ыытыыны уонна үлэ чааһын эрэсиимин тутуспат буолууну ааттыахха сөп», – диэтэ Административнай хамыыһыйа бэрэссэдэтээлэ.

Суһал штаб атыы-эргиэн эбийиэктэригэр, ас-үөл, үөрэх тэрилтэлэригэр, сынньалаҥ кииннэригэр рейдэ ыытарын тохтоппот.