Бастыҥ суоппар уонна оптуобус маршрута ааттаннылар

Дьокуускай куоракка быйылгы «Оптуобус маршрутун бастыҥ суоппара» уонна «Куорат олохтоохторун тиэйэр бастыҥ маршрут» күрэх кыайыылаахтара билиннилэр. Ол курдук киин куорат бастыҥ суоппарынан Денис Дроздов ааттанна. Оттон «Куорат олохтоохторун тиэйэр бастыҥ маршрутунан» 17-с №-дээх оптуобус маршрута буолла («Сервис Авто» ХЭТ, дириэктэр – Семен Иванов).

Санатар буоллахха, күрэх икки номинациянан ыытылынна – «Оптуобус маршрутун бастыҥ суоппара» уонна «Куорат бастыҥ пассажирскай маршрута». Бастакы номинацияҕа 10 суоппар кытынна. Кыттааччылар суол быраабылатын билиилэрин, итиэннэ мэһэйдэри туоратан көрдөрдүлэр. Суоппардар ГИБДД бэлэмнээбит 20 ыйытыылаах билиэттэригэр хоруйдаатылар. Итини таһынан, дьүүллүүр сүбэ тырааныспар техническэй туругун сыаналаата. Ол курдук, тырааныспар 36 критерийинэн сыаналанна, ол иһигэр ититиигэ, вентиляцияҕа, сырдатыыга, видеорегистраторга, аудиоинформаторга, валидаторга, оптуобус төһө ырааһыгар болҕомто уурулунна.

«Пассажирдары тиэйиини тэрийээччи» МХТ салайааччыта Эдуард Садовников бэлиэтээбитинэн, куонкурус уопсастыбаннай тырааныспар суоппарын идэтин статуһун үрдэтэр сыаллаах ыытыллар.

Иккис номинация кыайыылааҕын сүүмэрдииргэ дьүүллүүр сүбэ олохтоохтортон үҥсүү киирбэт, туох да быһылаана суох куорат маршрута талылынна. Итини сэргэ графиктарын тутуһууга болҕомто уурулунна.

Күрэх кыайыылаахтара куорат баһылыга Евгений Григорьев харчынан бириистэрин туттулар.