Баһылык энергетиктэр иннилэригэр отчуоттаата

Киин куорат ааспыт 2023 сыллааҕы социальнай-экономическай көрдөрүүлэрин түмүгүнэн отчуоту Евгений Григорьев «Якутскэнергосбыт» ДЭК кэлэктиибигэр билиһиннэрдэ.
Баһылык киин куорат 2023 сыллааҕы сүрүн ситиһиитинэн дойду бэрэсидьиэнэ Владимир Путин Дьокуускай куорат 2030 сылга диэри сайдыытын маастар-былаанын өйөөн, Арассыыйа бырабыыталыстыбатынан бигэргэтиллибитин ааттаата. 
Евгений Григорьев итини сэргэ үүммүт сылга үөрэх, суол тутуутун, тырааныспар, олорор дьиэнэн хааччыйыы, хомунаалынай хаһаайыстыба, спорт, физическэй кулуура, тыа хаһаайыстыбатын эйгэлэрин иннигэр турар соруктары кэпсээтэ.

Отчуот кэнниттэн энергетиктэр салайар хампаанньалар өҥөнөн туһаныыга иэстэрин, муниципалитет салайар хампаанньалары талыыга уонна анааһыҥҥа кыттыыны ылыахтааҕын туһунан санааларын эттилэр, маны сэргэ Можайскай уул., 19 уонна Кыайыы пааркатыгар уулусса уотун тардар наадатын ыйдылар, куорат уопсастыбаннай тырааныспарын саҥа ситимин, маршрутнай оптуобустар схемаларын, Ефимов уулуссатын өрөмүөнүн уонна 17-с кыбаартал олохтоохторун көһөрүү болдьохторун интэриэһиргээтилэр.