Бүтүн Арассыыйатааҕы сүүрүүгэ биэс тыһыынча кэриҥэ киһи кытынна

Сүүрүү «Юность» стадионтан саҕаланна уонна АГАТУ утары территорияҕа түмүктэннэ. Дистанция уһуна – 2 км. Бастакынан идэтийбит спортсменнар саҕалаатылар, кинилэр кэннилэриттэн тэрилтэлэр салайааччылара, онтон бары кыттааччылар сүүрдүлэр.

Сүүрүү түмүгүнэн кыайыылаахтар уонна призердар бэйэлэрин категорияларыгар өйдөбүнньүк мэтээллэринэн, грамоталарынан уонна кубоктарынан наҕараадаланнылар.

Ол курдук, кыргыттар ортолоругар үс бастакы миэстэни ДЮСШ-1 иитиллээччилэрэ Анастасия Жиркова, Карина Зайцева уонна Алиса Гуляева ыллылар. Уолаттарга ДЮСШ-5 иитиллээччитэ Альберт Петров кыайыылааҕынан таҕыста, иккис миэстэҕэ – 9-с №-дээх орто оскуола үөрэнээччитэ Владислав Адасько, үһүскэ – ДЮСШ-1 иитиллээччитэ Родомир Захаров.

Дьахталларга Саргылана Лугинова чемпионнаата, иккис миэстэҕэ – Софья Шилова. Эр дьон ортолоругар Филипп Собакин бастаата, иккис миэстэҕэ – Николай Зыков, үһүскэ –  Антон Дегесов.

Дьахталлар ортолоругар (ПОДА/ истибэттэр спортара) УОР-тан Татьяна Бурым кыайыылааҕынан таҕыста, иккис миэстэҕэ ХИФУ-тан Татьяна Манжурова, үһүскэ – Эльвира Хусаинова. Эмиэ ити көрүҥҥэ (ПОДА/ истибэттэр спортара), эр дьон ортотугар үс бастакы миэстэҕэ УОР бэрэстэбиитэллэрэ Николай Свинобоев, Александр Парников уонна Дмитрий Усов таҕыстылар.

Салайааччы дьахталлар ортолоругар Гульфина Адасько бастаата, иккис миэстэҕэ – Раиса Докторова. Эр дьоҥҥо Виталий Адасько кыайыылааҕынан таҕыста, иккис миэстэҕэ – Алексей Евстратов, үһүскэ – Геннадий Мордовской.