«Азия оҕолоро» оонньууларга үҥкүүһүттэр хамаандаларын бэлэмнииллэр
Үҥкүү спордун сойууһун уонна художественнай гимнастика федерациятын бэрэсидьиэнэ Людмила Николаева уонна спорт миниистирэ Леонид Спиридонов художественнай гимнастика уонна үҥкүү спордун билиҥҥи туругун, итиэннэ сайдар кэскилин, «Азия оҕолоро» оонньууларга бэлэмнэниини дьүүллэстилэр.
Санатар буоллахха, быйылгыттан спортсмен-үҥкүүһүттэр бэлэмнэниилэрин күүһүрдэр сыаллаах элбэхтик турнирдарга сылдьаллар. Хамаандалар дойду бастыҥ гимнастическай кииннэрин уонна Арассыыйа үрдүк таһымнаах тренердарын кытта үлэлэһэллэр.
Ол курдук, өрөспүүбүлүкэ икки хомуур хамаандата уонна биирдиилээн кыттааччылар Москва уонна Ульяновскай куораттарга, художественнай гимнастикаҕа бэлэмниир олимпийскай кииннэргэ эрчиллэллэр. Мантан сиэттэрэн, спортсменнар сайдыбыттара, маастарыстыбалара үрдээбитэ көстөр.
Итини таһынан, өрөспүүбүлүкэҕэ үҥкүүнэн уонна художественнай гимнастиканан дьарыктанарга аналлаах саҥа балаһааккалар арыллан үлэлииллэр.
Көрсүһүүгэ Леонид Спиридонов уонна Людмила Николаева бииргэ үлэлиир былааннарын дьүүллэстилэр, кыһалҕалары чопчулаатылар уонна быһаарар суоллары тобуллулар. Спорт миниистирэ спортивнай үҥкүүгэ регионнааҕы хомуур хамаанда чилиэннэригэр Арылхан Даниловка уонна Милослава Мазановаҕа иккис спортивнай разряды иҥэрэр туһунан дастабырыанньаны үөрүүлээх быһыыга-майгыга туттарда.
Сонуннар
Ордук ааҕаллар
