Айылҕабыт уратытын көрдөрөр арт-эбийиэк, оптуобустарга эрэ буолбакка, массыыналарга эмиэ сылаас тохтобул

Тохсунньу 29 күнүгэр баһылык Евгений Григорьев IT эйгэтин бэрэстэбиитэллэрин иннигэр отчуоттаата. Мунньах киин куораттааҕы «IT-куб» оскуолаҕа буолан ааста.

Көрсүһүүгэ инновация саҥа миниистирэ Василий Ефимов, «Якутия» технопаарка», IT-паарка резиденнэрэ, «IT-куб» оскуола үлэһиттэрэ,  Өрөспүүбүлүкэтээҕи инфокоммуникационнай технологиялар кииннэрин, IT-хампаанньалар, интернет-провайдердар, суотабай сибээс оператордарын бэрэстэбиитэллэрэ кыттыыны ыллылар.

Евгений Григорьев ааспыт 2023 сыл сүрүн ситиһиитинэн дойду баһылыга Владимир Путин Дьокуускай куорат маастар-былаанын өйөөбүтүн ааттаата. Дойду бэрэсидьиэнэ маастар-былаан чэрчитинэн киллэрбит сүрүн соруктарын иһигэр кэлэр уон сылга Дьокуускайга 450 млрд солк. суумалаах уонунан социальнай, инженернэй эбийиэк, тырааныспар инфраструктурата тутуллара былааннанарын үөрэ иһитиннэрдэ.

IT эйгэтин бэрэстэбиитэллэрэ Евгений Григорьевтан Сайсары уокуругар паарка, Маҕаҥҥа оптуобус сылаас тохтобуллар, куоракка массыыналары туруорар сылаас миэстэлэр наадаларын бэлиэтээтилэр, урбаанынан дьарыктанарга сир учаастагын ыйыталастылар.

Маны сэргэ үөрэх бырагыраамаларын, куурустары оҥорууну, IT-хампаанньаларга стажировканы ааһыыны интэриэһиргээтилэр, Строительнай уокурукка оптуобус маршрутун киллэрэр, IT-паарка таһынааҕы светофордар үлэлэрин, оскуола үөрэнээччилэригэр идэни таларга көмөлөһөр сервис, ыттары уонна сылгылары быһаарар өйдөөх камералалар тула санааларын эттилэр. Оҕолорго аналлаах куттала суох уонна табыгастаах эйгэни тэрийиигэ куонкурус, Дьокуускайга видео оонньуу индустриятын кластерын, IT-үөрэхтээһин сэбиэтин тэрийии, туризмы сайыннарыыга цифровизация оруола, Саха сирин айылҕатын уратытын көрдөрөр арт-эбийиэк курдук ураты бырайыактар, толкуйдар эмиэ этилиннилэр, диэн Олохтоох дьаһалта пресс-сулууспата иһитиннэрэр.