Асчыт Аина

Оҕо айымньытын дыбарыаһыгар “Юный кулинар” куруһуок үлэлиир. Салайааччы – Надежда Дмитриева.

Аина Охлопкова бу куруһуокка үһүс кылаастан сылдьар. Астыырын олус сөбүлүүр, ордук бурдук аһын буһарарын ордорор. Кыысчаан дьарык аайы элбэххэ үөрэнэр. Бүгүн кырачаан асчыт сөбүлээн астыыр ырысыабын үллэстэр.

 “Улар уйата” туорт

Тиэстэҕэ наада:

Бурдук – 2,5 ыстакаан,

Сымыыт – 3 устуука,

Суода – тарбах төбөтүгэр,

Мүөт –  2 ост.ньуоска.

Кириэмҥэ наада:

Чөчөгөй (сливки),

Саахар –  1 ыстакаан,

Плитка сакалаат.

Бастаан тиэстэбитин оҥоробут. Састаабын барытын булкуйабыт, халбаһы курдук уһун синньигэс фигура оҥоробут. Ону тэҥ гына быһабыт, шарик оҥоробут. Онтон бу шариктары лэппэтэн кыра лэппиэскэ оҥоробут. 180 кыраадыс итии духуопкаҕа 7-10 мүнүүтэҕэ буһарабыт. Бэчиэнньэбит буһар кэмигэр кириэммитин оҥоробут. Чөчөгөйү саахары кытта миксеринэн эрийтэрэбит. Бэчиэнньэ бустаҕына, кириэмҥэ оймуу-оймуу, тэриэлкэҕэ араҥанан уурабыт. Бүтэһик араҥа кириэм буолуохтаах. Үрдүн теркаламмыт сакалаатынан киэргэтэбит.