«Армия-2021» форум чэрчитинэн байыаннай тиэхиньикэ быыстапката аһыллыаҕа
Атырдьах ыйын 28 күнүгэр СӨ ыччат дьыалаларыгар уонна социальнай коммуникацияларга Министиэристибэтэ уонна өрөспүүбүлүкэ Байыаннай комиссариата «Армия-2021» байыаннай-техническэй форуму ыыталлар.
Тэрээһин Дьокуускай куоракка «Россия – Моя история» историческай пааркаҕа ыытыллыаҕа. Форум чэрчитинэн Аҕа дойду Улуу сэриитин саҕанааҕы байыаннай тиэхиньикэ быыстапката, «Гром» ураты аналлаах этэрээт, кинологическай сулууспа көрдөрүүлээх бырагыраамалара, байыаннай сулууспаҕа үлэҕэ киириигэ уонна хантыраагынан сулууспалааһыҥҥа ыҥырыы тэриллиэҕэ.
Форумҥа кэлбит киин куорат олохтоохторо уонна ыалдьыттара аныгы байыаннай тиэхиньикэ уонна сэрии сэбин арааһын көрүөхтэрэ. Көрдөрүүгэ барыта 19 бойобуой уонна аналлаах тиэхиньикэ таһаарыллыахтара.
Музей балаһааккатыгар Росгвардия, ДОСААФ, Арассыыйа ЫБММ, ИДьО, УФСИН анал тиэхиньикэлэрэ, аныгы уонна Аҕа дойду Улуу сэриитин саҕанааҕы сэрии сэбэ, пуормалара көрдөрүллүөхтэрэ.
Итини таһынан, форум чэрчитинэн Улуу кинээс Александр Невскэй олоҕун, үлэтин сырдатар «Александр Невский. Судьба России» мультимедийнай быыстапка аһыллыыта буолуоҕа.
Форум бары санитарнай-эпидемиологическэй ирдэбиллэри тутуһан ыытыллыаҕа. Тэрээһиҥҥэ кэлээччилэр QR-кодтарын көрдөрөллөрө ирдэнэр.
Сонуннар
Ордук ааҕаллар
