Арассыыйа генеральнай прокурорун солбуйааччы Дмитрий Демешиҥҥэ Хатас оскуолатын көрдөрдүлэр

Учуутал Самсоновтар ааттарынан Хатас агрологическай оскуолатыгар саҥа салҕааһын дойду бэрэсидьиэнэ Владимир Путин көҕүлээһининэн 2019 сылтан олоххо киллэриллэр «Аныгы оскуола» бырайыагынан тутуллан, бу кыһын үлэҕэ киирбитэ.

4,9 кв/м иэннээх үс мэндиэмэннээх саҥа куорпуска 19 кабинет киирэр – библиотека, эмтиир кабинет, остолобуой, аактабай, спорт саалалара, үлэ уруоктарын ыытар мастарыскыайдар, киинэ, хаартыска устуудьуйата о.д.а.

Бэдэрээтчит «Сэттэ» хампаанньа генеральнай дириэктэрэ Игорь Федоров тутууга сүрүннээн Арассыыйаҕа оҥоһуллар матырыйаал туттуллубутун бэлиэтиир. Оттон оскуола дизайнын төрөппүттэр уонна учууталлар кэлэктииптэрэ бэйэлэрэ оҥорбуттар.

Бу күн үрдүк сололоох ыалдьыкка аныгы оборудованиенан толору хааччыллыылаах үлэ уруогун ыытар мастарыскыайдары, технология, урбаан кабинеттарын, информатика, агротехнология, автодьыала, сыыппара технологиятын кабинеттарын итиэннэ Хатас киэн туттуута П.П. Федорова аатынан агроинжиниринговай киини көрдөрдүдэр.

Куорат баһылыга Евгений Григорьев оскуола эргэ куорпуһугар эмиэ хапытаалынай өрөмүөн ыытыллыбытын бэлиэтээтэ.

П.Н. уонна Н.Е. Самсоновтар ааттарынан Хатас агрооскуолатын РФ Генеральнай прокурорун солбуйааччы Дмитрий Демешиҥҥэ Ил Дархан Айсен Николаев уонна Дьокуускай куорат баһылыга Евгений Григорьев көрдөрдүлэр, диэн иһитиннэрэр Олохтоох дьаһалта пресс-сулууспата.