11.07.2019 | 09:38

“АБААҺЫ БАЛАҔАНА” ЫҤЫРАР!

“АБААҺЫ БАЛАҔАНА” ЫҤЫРАР!
Ааптар: Киин Куорат
Бөлөххө киир

Сунтаардар эмиэ реалити-шоу устан эрэллэр

Былырыын саха телевидениетигэр, кэлин ютубка “Ферма-2. Дьол тааһа” диэн “Саха” көрдөрөр-иһитиннэрэр хампаанньа Сунтаардааҕы филиала устубут реалити-шоу жанрдаах биэриитин элбэх киһи сэҥээрбитэ.

Саха көрөөччүтүгэр сонун уонна ураты бырайыагы Сунтаар телевидениетын суруналыыстара олус сэргэх уонна дьоҥҥо тиийимтиэ гына оҥорон таһаарбыттара. Урут маннык хабааннаах биэрии суох буолан, Арассыыйа киин ханаалларыгар көрөр реалити-шоуларбытыгар майгынныыра буолаарай диэн, көрөөччүлэр тартаран туран көрбүттэрэ. Сахалыы реалити кылгас уонна кыттааччылара истиҥ, дьиҥ хайдах баалларынан сылдьар буоланнар, бэйэбит киэммит сэттэ төгүл бэрт буолан тахсыбыта.

Кыттааччылары туох күүтэрий?

Ыытааччылар - Нь.Харчасова, М.Кобельянова, М.Афанасьева

Дьэ, быйыл Сунтаар телевидениета эмиэ дьону сөхтөрөр, көрөөччү кутун тутар реалити-шоуну устар сыал-сорук туруоруммут. Ыытааччылары Мария Кобельянова-Тускулаананы, Мира Афанасьеваны, Ньургуйаана Харчасованы кытта кэпсэттибит: 

– Сунтаар телевидениетэ улуустартан биир бастакынан «Сунтаар сулуһа» диэн ааттанан, 1991 сыллаахха тэриллибитэ. 2001 сылтан «Саха» НКИХ Сунтаардааҕы филиалын салайааччытынан байыаннай суруналыыс Н.Кондаков аатынан судаарыстыбаннай бириэмийэ хаһаайката Ольга Захарова үлэлиир.  Билигин кэлэктиип 6 үлэһиттээх. Олус элбэх биэриилэри, сонуннары бэлэмнээн, тиһигин быспакка саха телевидениетыгар көрдөрөбүт.

Анал бырайыактарынан эмиэ дьарыктанабыт. Ол курдук, «Олох көмүс күһүнэ», «Саҥа кэм киһитэ», «Күннээх саха», «Мин дьиэм» диэн биэриилэр өсрөпүүбүлүкэ көрөөччүтүн биһирэбилин ылбыттара.

Кэлэктиип сыл аайы саҥа бырайыактары олоххо киллэрэргэ дьулуһар. Холобур, «7 күн» диэн бырайыак Саха телевидениетигэр бастакы реалити-шоу киэбинэн уһуллубута. Ону салҕаан 3-с төгүлүн «7 күн. Абааһы балаҕана» диэн ааттаах бырайыагы былааннаатыбыт.

Реалити-шоубут саҕаланарын туһунан саҥа биллэрдибит. Кыттааччылары ыҥыртаан эрэбит.

– Буолаары турар тэрээһиҥҥитигэр кимнээҕи ыҥыраҕыт?

Рекламабыт өрөспүүбүлүкэ үрдүнэн киэҥник тарҕанна. Кыттыан баҕалаах ыччаттар баалларын биллэрдилэр. Ол эрээри элбэхтэн аҕыйаҕы, чулууттан чулууну талар үчүгэй. Кастинг салҕанар. Аналларын көрсүөн, бэйэлэрин киэҥ эйгэҕэ таһаарыан баҕалаах сытыы-хотуу ыччаты кэтэһэбит. 8-914-114-88-98 нүөмэргэ бэйэлэрин тустарынан тэттик кэпсээни төлөпүөҥҥэ да устан ыытыахтарын сөп (хайдах баарынан, устуу хайаан да профессиональнай буоларын  ирдээбэппит).  

Тургутуу уонна аналы булуу

"Ферма 2. Дьол тааһа" түгэннэриттэн

Реалити-шоу формата саха телевидениетигэр олох саҥа көрүҥ. Манна бэйэ-бэйэҕэ сыһыан, хамаанданан үлэ, бэйэ хаачыстыбыта туох да киэргэтиитэ суох күөх экран нөҥүө көстөрүн ситиһиэхтээхпит. Реалити-шоу тутула оонньуу, күрэхтэһии быһыытынан барыаҕа.

Кыттааччылар айылҕа араас тургутууларын ааһыахтара. Көрөөччүлэр интэриэстэрин сүтэрбэт курдук, күрэс ис тутулун барытын арыйан биэрбэппит.

– Тоҕо “Абааһы балаҕана” диэн ааттаатыгыт?

Олус элбэх ааты толкуйдаан баран, «7 күн. Абааһы балаҕана» диэни таллыбыт. Тоҕо диэтэххэ, бастакы реалити-шоубут “7 күн” диэн ааттаах этэ. Оттон “Абааһы балаҕана” диэн сир аата. Реалити-шоубут бу сиргэ ыытыллыахтаах. Абааһы балаҕана билигин туристическай база быһыытынан үлэлии турар айылҕа мааны туоната. Онон сахабыт дьонугар ытык сирбитин билиһиннэрэр сыаллаахпыт.

– Көрөөччүнү быйыл туох ураты күүтэрий?

Көрөөччү кутун туппут реалити-шоу - "Ферма 2 . Дьол тааһа"

Кырдьык, «Ферма 2: Дьол тааһа» бырайыак дьон болҕомтотун тардыбыта. Тыа сирин олоҕун ыччаттарга билиһиннэрбитэ, көрөөччү биһирэбилин ылбыта. Ону салҕыы сайыннаран, Сунтаар улууһугар “Экология уонна доруобуйа сыла” биллэриллибититтэн сиэттэрэн,  ыччаты айылҕаны кытта алтыһыннаран, бэйэлэрин тургутан көрөллөрүгэр кыах биэрээри, бу бырайыагы толкуйдаабыппыт.

Сулумах дьоҥҥо иккис аҥаардарын булалларыгар эмиэ көмө. Ол курдук, бастакы тэрээһинтэн ыал буолан, икки оҕолонон олорор дьон баар. Иккис бырайыакка эмиэ билсибит, билигин доҕордуу дьон бааллар. Онон биһиги бырайыакпыт суорумньу өттүгэр саҥа сүүрээн быһыытынан тоҕоостооҕун көрдөрдө.

________________________________________________________________

Кыттыан баҕалаахтарга

Тэрээһин от ыйын 15-21 күннэригэр ыытыллар. Ол аата кыттааччы Сунтаарга от ыйын 14-гэр баар буолуохтаах.

Кастины ааһаргар ирдэнэр:

Бэйэҥ тускунан интэриэһинэй ролик устан ыытаҕын. Устуу хаачыстыбата, профессиональнай буолара ирдэммэт. Саамай сүрүнэ онно аатыҥ, араспаанньаҥ, хантан сылдьарыҥ, сааһыҥ, үлэҥ, үөрэҕиҥ, сөбүлүүр дьарыгыҥ, олоххо кынат тылыҥ, олоххо сыалыҥ баар буолуохтаах. Билсэр төлөпүөммүт, инстаграмм страницаҥ аадырыһа (от ыйын 10 күнүгэр страницаҥ аһаҕас буолуохтаах), оҕолооххун дуу, суох дуу, тоҕо реалити-шоуга кыттыаххын баҕараргын кэпсиигин.

8-914-114-88-98 нүөмэргэ роликкын кэтэһэбит!

Өскөтүн Эн, БИҺИГИ ирдэбиллэрбитигэр сөбүлэһэр буоллаххына, роликта ыыт.

1. Кыттыы усунуостаах –  3000 солк.

2. Кэлии-барыы ороскуотун бэйэҥ уйунаҕын.

3. Хонор сиргин бэйэҥ уйунаҕын.

4. Видеоҕа бу күннэр усталарыгар куруутун уһулабыт, онно сөбүлэҥ биэрэҕин. Туох да таҕыстын – барыта ТВ-га көстүөхтээх.

5. Доруобайыҥ (БАК-анаалыс, стафилоккок) уонна уйулҕа өттүнэн чэбдигиҥ туһунан ыспыраапка ирдэнэр.

6. Утуйар таҥас, утуйар мөһөөччүк.

7. Суунар, аһыыр, бэйэ туттар тээбиринэ.

8. Таҥаска: купальник, үлэ таҥаһа (милитари), спортивнай таҥас, саппыкы, оробуочай үтүлүк.

9. Бырдах эмэ.

10. Ыллыыр, үҥкүүлүүр буоллаххына, фонограммаҕын илдьэ кэлэҕин.

11. Тэрээһин кэмигэр төлөпүөнүнэн туттууну хааччахтыыбыт.

Хамыыһыйа видео устан ыыппыккын көрөр, онтон таллаҕына, эйиэхэ эрийиэҕэ.

Тэрийэр сүбэ

Сонуннар

Ордук ааҕаллар

Утуйуу хаачыстыбата улахан суолталаах
Сонуннар | 15.03.2024 | 14:00
Утуйуу хаачыстыбата улахан суолталаах
Кулун тутар 15 күнүгэр Аан дойдутааҕы Утуйуу күнэ бэлиэтэнэр. ВОЗ статистикатынан, нэһилиэнньэ 10-30% кыайан утуйбакка (бессонница) эрэйдэнэр, сорох дойдуларга ити көрдөрүү 50−60%-ҥа тиийэр.
Сыана үрдээһинэ
Сонуннар | 22.03.2024 | 18:00
Сыана үрдээһинэ
(2024 сыл олунньу ыйдааҕы көрдөрүүтүнэн)
Социальнай биэнсийэ эбиллэр
Сонуннар | 16.03.2024 | 18:00
Социальнай биэнсийэ эбиллэр
Муус устар 1 күнүттэн социальнай биэнсийэ 7,5 бырыһыан үрдүүр. Бу туhунан 262 N-дээх уурааҕы кулун тутар 5 күнүгэр Арассыыыйа Бырабыыталыстыбата бигэргэттэ. Индексация кээмэйэ ааспыт сылга биэнсийэлээхтэргэ олох таһымын алын кээмэйин улаатыытынан ааҕыллар. Бу төлөбүргэ анаан социальнай пуонда бүддьүөтүгэр 37,5 млрд солк. көрүлүннэ. Статитстика көрдөрөрүнэн, Арассыыйаҕа 4 мөлүйүөнтэн тахса киһи социальнай...
Сергей:  «Уолаттар санаалара-оноолоро харахтарыгар көстөр»
Дьон | 21.03.2024 | 18:00
Сергей: «Уолаттар санаалара-оноолоро харахтарыгар көстөр»
Оҕо сылдьан разведчиктаах киинэлэри умсугуйан көрөрбүт, кинилэр курдук буолуохпутун баҕаран, сэриилээх оонньуурбут, саһа, сыбдыйа, сыылла сылдьан өстөөхтөрбүтүн самнарарбыт.  Разведчик диэн тылы иһиттэхпинэ, тута харахпар Штирлиц уобараһа көстөр. Кини өстөөхтөр уйаларыгар тиийэн, былааннарын, дьайыыларын биһиги дьоммутугар тиэрдэн, кыайыыны ситиһэргэ улахан кылаатын киллэрсэр.   Ол аата дьиҥнээх разведчик хайдах буолуохтааҕый? Кини боростуой саллаат...