«Аҕа күрэҕэ — 2022»
Кулун тутар 27 күнүгэр Сайсары күөлүгэр V-с төгүлүн куораттааҕы «Аҕа күрэҕэ» буолан ааста. Тэрээһин Саха АССР 100, Дьокуускай куорат 390 уонна Саха өрөспүүбүлүкэтигэр Ийэ сылларын чэрчитинэн ыытылынна. Күрэххэ киин куорат бары уокуруктарыттан 15 хамаанда кыттыыны ылла.
Хамаандалар уопсайа сэттэ көрүҥҥэ күрэхтэстилэр: бэрэбинэни суоруу, маһы хайытыы, ойбону алларыы, остуолбаҕа тахсыы, кутаа оттон, чэй оргутуу уонна дьиэ кэргэннэрин билиһиннэрэр айар күрэх.
«Аҕа күрэҕэ – 2022» үбүлүөйдээх күрэхтэһиинэн Дьокуускай куорат баһылыга Евгений Григорьев эҕэрдэлээтэ.
«Бүгүн биһиэхэ сүрдээх үөрүүлээх күн. Дьиэ кэргэн – ханнык баҕарар киһи олоҕор улахан суолталаах. Киһи личность быһыытынан сайдарыгар, иитиллэн тахсарыгар дьиэ кэргэнэ дьоһун суолталаах оруолу ылар. Онон бу күрэхтэһии сүрүн ис хоһооно дьиэ кэргэн сыаннастарын бөҕөргөтүүгэ итиэннэ аҕалар уонна уолаттар түмсүүлэригэр сытар», - диэтэ Евгений Григорьев.
«Урукку сылларга кыайыылаахтарга бириистэри партнердар уонна спонсордар туттарар буоллахтарына, быйыл, Дьокуускай куорат дьаһалтатын баһылыга Евгений Григорьев өйөөн, бириистэри куорат дьаһалтата анаата. Кыайыылаахтарга 50 тыһыынча солкуобайы, 2-с миэстэҕэ – 35 тыһыынчаны, 3-с миэстэҕэ – 20 тыһыынча солкуобайы», - диэн кэпсиир Дьокуускай куорат Аҕаларын сүбэтин бэрэссэдээтэлэ Егор Попов.
Күрэхтэһии түмүгүнэн уопсай түмүккэ үһүс миэстэни Строительнай уокуруктан Дьячковтар дьиэ кэргэттэрэ ылла. Иккис миэстэни Пригороднай бөһүөлэгиттэн Сивцевтар ыллылар. Оттон Кылаан кыайыылааҕынан Киин уокуруктан Винокуровтар дьиэ кэргэттэрэ таҕыста.
Бэлиэтээн эттэххэ, быйылгы күрэх кыайыылаахтара уонна үрүҥ көмүс призердара Дьокуускай куорат чиэһин өрөспүүбүлүкэҕэ ыытыллар Аҕа күрэҕэр көмүскүөхтэрэ. Күрэх муус устар 2-3 күннэригэр Чурапчы улууһун Сылаҥ сэлиэнньэтигэр ыытыллар.
Быйылгы V-с спортивнай оонньуулары Дьокуускай куорат дьаһалтатын уопсастыбаннай сибээскэ уонна ыччат политикатыгар управление оҥордо.
Хаартыскалар ааптар уонна Семен Винокуров түһэриилэрэ
Сонуннар
Ордук ааҕаллар
