1709 социальнай хантараак 2024 сылга Саха сиригэр түһэрсилиннэ

Үлэ уонна социальнай сайдыы министиэристибэтин чахчытынан 2024 сылга Саха сиригэр 273,1 мөл. солк. суумалаах 1709 социальнай хантараак түһэрсиллибит. 
Хантараактар сүрүн хайысхалара: үлэ көрдөөһүн – 96, бэйэ дьыалатын арыныы – 367, кэтэх хаһаайыстыбаны тэринии – 91, олох очуруттан тахсарга туһуланар атын тэрээһиннэр – 1090, үлэлиир саастаах доруобуйаларынан хааччахтаах дьоҥҥо анал бырагыраама – 28, биэнсийэлээхтэргэ анал бырагыраама – 37.

2024 сылга, социальнай хантараак бэйэ дьыалатын арыныы уонна кэтэх хаһаайыстыбаны тэринии хайысхаларыгар  судаарыстыбаннай өйөбүл сууматын кээмэйэ улаатарын учуоттаан туран, 2800 хантараагы түһэрсэр былаан баар. Бу сыалга уопсайа 648,5 мөл. солк., ол иһигэр федеральнай бүддьүөттэн 343,7 мөл. солк. көрүллэн турар. 
Санатар буоллахха, 2024 сылтан социальнай хантараакка олоҕурар судаарыстыбаннай өйөбүл бэрээдэгэ уларыйан турар. Ол курдук, быйылгыттан бэйэ дьыалатын арыныан уонна кэтэх хаһаайыстыба тэриниэн баҕалаахтар урбаан эйгэтигэр дьоҕурдарын бэрэбиэркэлиир тургутугу ааһаллара булгуччулаах. Тургутугу ааспатахтар «Мой бизнес» кииннэргэ үөрэх ааһаллар. Ону сэргэ сайабылыанньа биэрээччи дохуотун ааҕыыга дьиэ кэргэн саамай чугас дьонноро эрэ учуоттанар – официальнай кэргэн уонна 23-гэр диэри саастаах оҕолор (орто эбэтэр үрдүк үөрэххэ үөрэнэр түгэннэригэр).

2024 сылтан социальнай хантараагынан урбаанынан дьарыктаныан баҕалаах үлэлээбэт биэнсийэлээхтэр эмиэ туһанар кыахтаахтар, өскөтүн тус дохуоттара муҥутаан тиийинэн олоруу сууматын 1,5 төгүл аһарбат түгэнигэр. Ону сэргэ СӨ Бырабыыталыстыбатын бэс ыйын 11 күнүнээҕи дьаһалынан социальнай хантараагы түһэрсэргэ бастакы уочарат бырааптаах категориялар быһаарыллыбыттара - элбэх оҕолоохтор, оҕолоох дьиэ кэргэттэр уонна анал байыаннай дьайыы кыттыылаахтарын дьиэ кэргэттэрин чилиэннэрэ. Маны сэргэ «Мин бастакы хамнаһым» пилотнай бырайыак балаһыанньата бигэргэтиллибитэ. 
Санатар буолалахха, Ил Дархан 2023 сыл балаҕан ыйын 28 күнүнэҕи дьадайыыны утары дьаһаллар туһунан ыйааҕыгар кэлэр биэс сылга үлэтэ суох буолууну икки төгү аччатарга сорук туруорбута. Дойду баһылыга Владимир Путин дьадайыыны утары биир көдьүүстээх миэрэнэн социальнай хантараак буолуохтааҕын бэлиэтээн турар, диэн иһитиннэрэр Ил Дархан уонна Бырабыыталыстыба пресс-сулууспата. Хаартыска: Чурапчы оройуонун социальнай харыстабылга управлениета.