1-гы №-дээх оскуола саҥа дьиэтэ 2024 сылга диэри тутуллуоҕа

Киин куорат 1-гы  №-дээх оскуолатын саҥа дьиэтэ 2024 сылга диэри тутуллуоҕа. Ол туһунан СӨ баһылыгын уонна бырабыыталыстыбатын пресс-сулууспата иһитиннэрэр. 
Оскуола билиҥҥи дьиэтин туругун чинчийии түмүгэ көрдөрбүтүнэн, өссө биир сыл үлэлиир кыахтааҕа, оҕолорго куттал суоһаабата быһаарыллыбыт.  
Быйылгы үөрэх дьылын тухары Ленин проспегын 50 №-гэр баар Дьокуускайдааҕы потребительскай кооперация атыы-эргиэн экэнэмиичэскэй колледжын дьиэтигэр капитальнай өрөмүөн ыытыллыаҕа. Онтон 2022 сылга  1-гы  №-дээх оскуола быстах кэмҥэ итиннэ көһөр. Өрөмүөн өрөспүүбүлүкэ бүддьүөтүттэн үбүлэнэр. 
Бу иннинэ, Ил Дархан Айсен Николаев бырабыыталыстыбаҕа куорат былааһын кытта бииргэ үлэлээн, 1-гы  №-дээх оскуола эргэрбит дьиэтин боппуруоһун быһаарар уонна оҕолор, педагогтар үөрэнэр-үлэлиир усулуобуйаларын тэрийэр, ону сэргэ Ленин проспегар саҥа, аныгылыы оскуола бырайыагын олоххо киллэрэр сорудаҕы биэрбитэ. 
Куорат баһылыга Евгений Григорьев бэлиэтээбитинэн, 2022 сылтан саҥа оскуола тутуутун бырайыага саҕаланан, урукку миэстэтигэр тутуллар. Бырайыак 2024 сылга диэри оросчуоттаммыт. Саҥа оскуола дьиэтэ уруккутунааҕар улахан уонна үөрэҕирии тэрилтэлэрин ирдэбиллэригэр толору эппиэттиир буолар.