Ыты эмиэ быраабыланан иитэргитин умнумаҥ

СӨ Ветеринарияҕа департамена иһитиннэрэринэн, 2024 сыл олунньу 12 күнүнээҕи туругунан Дьокуускай куорат территориятыгар Дьиэ кыылын көрүү-истии быраабылаларын тутуһууну бэрэбиэркэлиир 59 эриэйдэ тэриллибит, ол чэрчитинэн 378 өйдөтөр сурук туттарыллыбыт, 159 сэрэтэр бэсиэдэ ыытыллыбыт.
Маны сэргэ СӨ Административнай буруй туһунан кодексатын 5.4 ыст. 1 ч. – 22, 5.4 ыст. 2 ч. 2 боротокуол толоруллубут. 23 уурааҕынан уопсайа 29 тыһ. солк. суумаҕа ыстараап олохтоммут.
Санатар буоллахха, Саха сиригэр дьиэ кыылларын көрүү-истии, харайыы бэрээдэгэ СӨ Бырабыыталыстыбатын 2014 сыл атырдьах ыйын 1 күнүнээҕи 237 №-дээх уурааҕыгар олоҕурар.
Дьокуускай куоракка көрүүтэ-истиитэ суох (моойторук эппиэтинэстэн босхолообот) сылдьар дьиэ кыылларын Дьэллик кыыллары тутар пууҥҥа тиэйэн аҕалыллар. Пууҥҥа тутуллан уонна тиэйиллэн кэлии, олоруу ороскуотун хаһаайын уйунар.