Ыстараап күүскэ киирэн эрэр

Быраабы араҥаччылыыр уорганнар Саха сиригэр дьиэҕэ олоруу бэрээдэгин кэһиигэ 100-тэн тахса боротокуолу толордулар. Бу туһунан Ил Дархан Айсен Николаев инстаграмыгар суруйар. Кини этэринэн, өрөспүүбүлүкэ олохтоохторо дьиэҕэ олоруу эрэсиимин билигин да улахаҥҥа уурбаттар.

Уопсастыбаннай тырааныспарга 65-тэн үөһээ саастаах дьон кытта айанныыр, күн аайы дьиэтиттэн тахсар. Оптуобуска айан карточкатынан тутталларынан көрдөххө, аҕам саастаах дьон бэйэ изоляциятын бэрээдэгин кэһэллэр диэн баһылык Сардаана Авксентьева инстаграмҥа быһа эпииригэр эмиэ этэн турар.

Дьокуускайга полиция үлэһиттэрэ уулуссаларга дьуһуурустубалыыллар. Дьаарбайа сылдьар, суһал наадата суох таһырдьа тахсыбыт дьону ыстарааптыыллар уонна дьиэлэригэр утаараллар.

“Самоизоляция” билигин булгуччулаах. Физическэй сирэй, ол аата көннөрү киһи, 1000 солкуобайтан саҕалаан 30 000 солк. тиийэ ыстараапка ууруллуон сөп – бу “муҥутуур бэлэмнээх буолуу эрэсиимэ” олохтонно да, туттуллар накаастабыл. Оттон дуоһунастаах дьон бэрээдэги кэстэхтэринэ – 10 000-50 000 солк., ИП-ларга – 30 000-50 000, юридическэй сирэйдэргэ – 100 000 – 300 000 солк. ыстараап олохтонно.

«Маассабай ыарыы кутталын үөскэппит санитарнай- эпидемиологическай быраабыланы кэһии» диэн ыстатыйанан Алдан оройуонун 49 саастаах олохтооҕор холуобунай дьыала тэрилиннэ. Эр киһи Роспотребнадзор ирдэбилин толорботох. Кини бэйэ изоляциятын бэрээдэгин тутуспатах, Алдан уопсастыбаннай миэстэлэригэр сылдьан, балачча элбэх киһини кытары алтыспыт, сутуйбут. Алтыспыт дьонун барыларын обсерваторга киллэрдилэр. Ыарыһах билигин Алдан киин балыыһатын инфекционнай отделениетыгар эмтэнэр.