Ыччат дьаһалтатын баһылыга талылынна

Мунньах бэрэссэдээтэлэ, куорат баһылыгын солбуйааччыта Наталья Степанова бэлиэтээбитинэн, ыччат иннигэр патриотическай иитии уонна гражданскай позицияны көҕүлээһин таһымын үрдэтии, чөл олоҕу  пропагандалааһын уонна волонтер куорпуһун тэрийии соруктара тураллар.

Уопсастыбаннай сибээстэргэ уонна ыччат политикатыгар управление начаалынньыгын эбээһинэһин толорооччу Андрей Михайлов иһитиннэрбитинэн, Ыччат дьаһалтатыгар 18 саастарыттан 35 саастарыгар диэри, куорат олоҕун хаачыстыбата үрдүүрүгэр туһуламмыт бэйэлэрэ тус идиэйэлэрдээх уонна бырайыактардаах уонна ону  Олохтоох дьаһалтаны кытта бииргэ үлэлэһэн олоххо киллэрэр баҕалаах дьону ылаллар.  

«Ыччат дьаһалтата ыччат уонна дьиэ кэргэн политиката, уопсастыбаннай сибээстэр курдук суолталаах хайысхаларынан үлэлиир. Бары бырайыактары Олохтоох дьаһалта салайааччылара куратор быһыытынан иилээн-саҕалаан ыыталлар» - диэтэ Андрей Михайлов.

Мунньах түмүгүнэн салайар састаап талылынна:

Ыччат дьаһалтатын баһылыга – Алексей Федоров;

Бастакы солбуйааччыта – Вероника Гуляева;

Солбуйааччылара – Константин Шарин, Егор Прокопьев, Елизавета Бабаева, Арина Исакова;

Эппиэтинэстээх сэкирэтээр – Анна Иванова.

Мунньах кэмигэр «Дьокуускай ыччатын политиката сайдыытыгар кылаатын иһин» бэлиэ В.П. Керемясов аатынан 3-с №-дээх анал спортивнай оскуола тренер-преподавателэ Петр Черкашиҥҥа туттарылынна.