Ыччат бэстибээлин сүүмэрдиир түһүмэҕэ саҕаланна

Олунньу 14 күнүттэн кулун тутар 8 күнүгэр диэри хас биирдии оройуон уонна куорат уокуруга мини-бэстибээллэри тэрийэр. Куонкурус түмүктүүр түһүмэҕэ кулун тутар 11-22 күннэригэр ыытыллар. Кулун тутар 25 күнүгэр, Дьокуускай куоракка, кыайыылаахтар сыаналаах бириистэринэн наҕараадаланыахтара.

Быйыл «Muus uSTAR» тректара саҥалыы күлүмүрдээтилэр. Тэрийээччилэр «Движение первых» Арассыыйатааҕы оҕо уонна ыччат хамсааһынын көҕүлээһининэн саҥа ааттары тобуллулар. Ол курдук, 12 трек ааттара – «Двигайся и достигай!», «Создавай и воплощай!», «Мир цифровизации!», «Играй и создавай!», «Расскажи о главном!», «Воплощай и вдохновляй!», «Поколение Профи!», «Стартуй к бизнесу!», «Перспектива в познании!», «Твори добро!», «ЭкоЛидер», «Дипломатия».

Санатар буоллахха, «Muus uSTAR» ыччат бэстибээлэ өрөспүүбүлүкэҕэ үһүс төгүлүн ыытыллар. Бэстибээл Саха сирин оҕолорун уонна ыччатын айар-тутар, спортивнай, цифровой уонна бизнескэ саҕалааһыннарын өйүүр сыаллаах. Бастакы уонна иккис бэстибээл хедлайнердара – спорт, култуура, наука чаҕылхай бэрэстэбиитэллэрэ. Маастар-кылаастарга кинилэр баай уопуттарынан, билиилэринэн үллэстэллэр.