Волонтердар бородууктанан көмөлөрүн түҥэтэн саҕалаатылар

Саха сирин волонтердара өрөспүүбүлүкэ 65-тэн аҕа саастаах олохтоохторугар биир кэмнээх бородууктанан көмө оҥоруутун саҕалаатылар. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Бүгүҥҥү күн туругунан биир кэлим төлөпүөн нүөмэригэр биэс тыһыынчаттан тахса сайаапка киирдэ. Ааспыт сууккаҕа 343 аҕам саастаах кырдьаҕас бородууктанан көмөнү тутта, ол иһигэр Саха сирин узбекскай диаспората босхо биэрбит оҕуруот аһа уонна фруктата түҥэтилиннэ.

Волонтердарга харысхал ньымаларынан тэрилтэлэр көмөлөһөллөр. Эстрада театрын уонна Үүнэр көлүөнэ театрын кэллэктииптэрэ волонтердарга 100-тэн тахса элбэхтэ туһаныллар мааскалары тиксэрдилэр. «Резерв» судаарыстыбаннай хонтуруолуур управление биэс тыһыынча биирдэ туһаныллар медицинскэй мааскалары тиксэрдэ. «ВостокСтрой капитал» ХЭУо антисептическэй сириэстибэлэринэн хааччыйда.

Муус устар 22 күнүн туругунан, Дьокуускай куоракка үлэлиир волонтердар ахсааннара 368 киһиэхэ тэҥнэһэр, Миирнэйгэ — 205, Сунтаарга — 118, Алдан оройуонугар — 106, Горнайга — 53, Ленскэйгэ — 50, Бүлүү улууһугар – 25.

Волонтердар регистрациялара http://мывместе2020.рф сайт нөҥүө ыытыллар.Сайаапкалары ылыы төгүрүк суукка устата үлэлиир биир кэлим федеральнай нүөмэрэ: 8 (800) 200-34-11.

Доруобуйа харыстабылын өрөспүүбүлүкэтээҕи киинин нүөмэрэ: 8 (800) 100-14-03.

Саха сирин волонтердарын киинин нүөмэрэ: 8 (4112) 35-10-46.

Волонтердар Саха сиригэр изоляция эрэһиимэ биллэриллибит улуустарын 65-тэн аҕа саастаах олохтоохторуттан сайаапкалары хомуйаллар. Алдан, Ленскэй, Бүлүү, Сунтаар, Горнай улуустара, ону тэҥэ Жатай бөһүөлэгэ уонна Дьокуускай куорат киирдилэр.

Сайаапканы хомуйууга киһи төрөөбүт күнэ уонна олорор аадырыһа учуоттанар. Көмө ылыан баҕалаахтар бу нүөмэрдэргэ эрийэн билсиҥ:

8 4112 31-90-72

8 4112 35-10-46.