ВОЛОНТЕР ХАМААНДАТЫН ХАҤАТ, КЭККЭТИН КЭҤЭТ!

Билиҥҥи уустук кэмҥэ аҕам саастаах ытык кырдьаҕастарга, доруобуйаларынан хааччахтаах дьоҥҥо үтүө санаалаах волонтердар хаһааҥҥытааҕар да күүс-көмө буоллулар.  

Бүгүн биһиэхэ Волонтердары кытта үлэлиир киин салайааччыта Алена Кычкина ыалдьыттыыр.

– Урут волонтердары бөх хомуйааччылар курдук көрөллөрө, сыыһа өйдүүллэрэ. Сорохтор хамнастаах үлэһит дии саныыллар. Дьиҥэр, волонтер диэн ким да модьуйуута суох, бэйэтин баҕатынан көмөлөһөр, үтүө дьыаланы оҥорор киһи.

Биһиги кииммит 2011 сылтан үлэлиир. Аҥаардас куорат эрэ волонтердарын буолбакка, бүтүн өрөспүүбүлүкэни хабар. Хайысхабыт улам кэҥээн, үлэбит үксээн, хамаандабыт хаҥаан иһэр. Сүрүн сыалбыт-сорукпут – волонтер хамсааһынын сайыннарыы, дьону көҕүлээһин, – диэн кэпсэтиибитин саҕалыыр.

Бары бииргэ!

– Орто анал, үрдүк үөрэх кыһаларын кытта ыкса ситимнээхтик үлэлиибит, араас тэрээһиннэри ыытабыт. Оскуолаларга лекция ааҕабыт.

Куоракка үксүн оскуола үөрэнээччилэрэ уонна устудьуоннар ордук көхтөөхтөр. Быйыл пандемия кэмигэр кулун тутартан Волонтердар куорпустара тэриллибитэ. Онно 200-тэн тахса куорат олохтооҕо көмөҕө кэлбитэ.

#Мывместе диэн Бүтүн Арассыыйатааҕы аахсыйаҕа биир бастакынан кыттыспыппыт. Бастаан киин куоракка, онтон улуустарга тэрийбиппит. Биһиги волонтердарбыт кырдьаҕастарга, инбэлииттэргэ билигин да көмөлөһөллөр. Кимэ да суох, соҕотох хаалбыт дьоҥҥо ас, эмп илдьэн биэрэллэр.

Хайысха элбэх

–Биһиги хайысхабыт киэҥ. Култуура волонтердара пааматынньыктары харыстыыр аналлаахтар, тэрээһиннэргэ күүс-көмө буолаллар. Ону таһынан кинилэргэ библиотечнай волонтердар киирэллэр.

Кыайыы волонтердара патриотическай иитиигэ аналлаах тэрээһиннэри ыыталлар, бэтэрээннэргэ көмөлөһөллөр.

Үрүҥ көмүс волонтердарбыт “Молоды душой” диэн хамсааһыннаахтар. 50-нарыттан үөһэ саастаах ытык дьоммут, чахчы даҕаны, сааһырар диэни билиммэккэ, эдэрдэри кытта тэбис-тэҥҥэ сылдьыһаллар, өссө ардыгар баһыйыахтарын да сөп. Пандемия кэмигэр хаайтаран хаалбакка, дьиэлэригэр олорон онлайн тэрээһиннэрбитигэр кытталлар, көмөлөһөллөр. “Азия оҕолоро” норуоттар икки ардыларынааҕы оонньууларга мэлдьи көхтөөхтөр.  

Медицина волонтердара олус элбэх тэрээһиннээхтэр. Экология волонтердара Ийэ айылҕаны харыстыыр үгүс үлэни ыыталлар. Субуотунньуктарын ааҕан сиппэккин.

Ааспыт нэдиэлэҕэ баһаары утары үлэлиир сулууспаны кытта сөбүлэҥ түһэристибит. Бу саҥа хайысха буолуоҕа. Сотору баһаары сэрэтэр үлэни ыытар волонтердары сүүмэрдиэхпит. Ону таһынан Ыксаллаах быһыы-майгы министиэристибэтин кытта бииргэ үлэлэһиэхтээхпит. Муммут, сүппүт дьону көрдүүргэ үөрэтиэхтээхтэр. Атын регионнарга маннык хамсааһын элбэх.

Биһиги кэккэбитигэр 7-тэн үөһэ саастаах ким баҕалаах киириэн сөп. Оскуоланы бүтэрээччилэр, үөрэххэ туттарсааччылар эбии баал ылаллар. Ол ханнык таһымнаах тэрээһиҥҥэ үлэлээбититтэн тутулуктаах. Төһө чаас үлэлээбитэ эмиэ ааҕыллар, киниискэтигэр барыта суруллан иһэр.

Волонтер буолуоххун баҕараҕын?

– Волонтердарбыт Бүтүн Арассыыйатааҕы сайт нөҥүө үөрэнэллэр. Регистрацияны ааһаллар, тус кабинеттаах буолаллар. Онно ханна, хас чаас үлэлээбиттэрэ ааҕыллан иһэр.

Уопут атастаһыыта олус сайдан эрэр. Уһук Илин регион волонтердарын киинэ Хабаровскай куоракка баар. Бүтүн Арассыыйа волонтердара Добро.рф диэн биир кэлим сайтаахпыт. Улахан тэрээһиннэр сонуннара, туох баар биллэриилэр онно тахсаллар. Волонтердар ону кэтии-маныы, көрө-истэ сылдьаллар. Ханна эрэ атын куоракка үлэлиэн, улахан тэрээһиннэргэ кыттыан баҕалаах волонтердар сайаапкаларын онно ыыталлар.  Онтон собеседование ааһаллар. Федеральнай тэрээһин буоллаҕына, скайп нөҥүө кэпсэтэллэр. Этэҥҥэ аастахтарына, ыҥырылыннахтарына, бырайыастарын, аһыыр ороскуоттарын Киин уйунар.

Ханнык баҕарар үлэ сыаналаныахтаах

– Бастыҥ волонтердарбытын хайаан да чиэстиибит, махтал суруктары туттарабыт. Сорохтор: “Биһиэхэ туох даҕаны наҕараада наадата суох”, – диэччилэр. Ол эрээри ханнык баҕарар үлэ сыаналаныахтаах, бэлиэтэниэхтээх. Онон хас биирдии тэрээһин кэнниттэн махтал суруктары туттара сатыыбыт. Күнү быһа үлэлиир буоллахтарына аһатабыт. Улахан тэрээһиннэргэ анал экипировканан хааччыйабыт. Сорох тэрийээччилэр өйдөбүнньүк бэлэхтэри туттараллар.

Алта ый устата Саха сирин үрдүнэн 26000-тан тахса сайаапка оҥоһулунна, 2500-тан тахса киһи көмөҕө кыттыста. Атырдьах ыйыгар бастакы бөлөҕү чиэстээбиппит. Пандемия кэмигэр үлэлээбит волонтердарбыт үрдүк таһымнаах махтал суруктары туттулар. Ааспыт нэдиэлэҕэ 22 киһини эҕэрдэлээтибит. Улуустартан эмиэ киирбиттэрэ. Сорохтор Арассыыйа Бэрэсидьиэнин мэтээлин, Росмолодежь махтал суруктарын, өйдөбүнньүк бэлэхтэри туттулар. Элбэх киһини мунньубаппыт. Хас да ыйы быһа тохтоло суох көмөлөспүт дьоммутун сыл бүтүөр диэри хайаан да чиэстиэхпит.

Хамсааһыммыт сайыннын, ахсааммыт элбээтин

–Улуус барыта олус үчүгэйдик үлэлиир. Бырайыактарга кыттан кыайаллар. Хамсааһыны сайыннарар үгүс үлэни ыыталлар. Чопчу биир улууһу чорбоппоппун.

Кыайыы волонтердарыгар эппиэтинэстээх сыл буолла.  Үгүс тэрээһин онлайн ыытылынна. Бэтэрээннэрбитин хаста да эҕэрдэлээтибит. Биллэн турар, бары ирдэбили тутуспуппут.

Бу соторутааҕыта Дьокуускай куорат Волонтердарын сэбиэтэ тэрилиннэ. Үлэ элбэх. Ким баҕалаах биһиги кэккэбитин кэҥэтиэн, хамаандабытын хаҥатыан сөп. Саҥа хамсааһыннары тэрийиэхпит, улуустарга улахан хамсааһыннарбыт үлэлэрин көҕүлүөхпүт. Волонтер ахсаана элбиэн, сайдыан баҕарабыт.

Соторутааҕыта Уһук Илин уокуругун форума буолан ааспыта. Онно “Доброволец России” диэн куонкурус полуфиналыгар биһиги волонтердарбыт бэйэлэрин бырайыактарын көмүскээбиттэрэ. 15 киһи кытынна. Түмүк биллэ илик.

Ахсынньы 5 күнэ – Волонтер күнэ. Москваҕа норуоттар икки ардыларынааҕы тэрээһин буолуохтаах. Ол иннинэ биһиги  сэтинньигэ улахан форум ыытыахтаахпыт. Барыта этэҥҥэ буолуо, санаа хоту сатаныа диэн эрэнэбит.

Волонтердарбытыгар, спонсордарбытыгар, министиэристибэтигэр барҕа махталбытын тиэрдэбит. Чуолаан пандемия саҕаламмытыгар туохтан да чаҕыйбакка, обсерваторга үлэлии барбыт хорсун дьоммутугар хаһыат нөҥүө махтанабыт.