Волейболга сэргэх киирсиилэр

Күрэхтэһиини үөрүүлээх быһыыга-майгыга Саха Өрөспүүбүлүкэтин физическэй култуураҕа уонна спорка миниистирин солбуйааччы Гаврил Мохначевскай, физкултуура уонна спорт үлэһиттэрин профсоюһун бэрэссэдээтэлэ Гаврил Сивцев, Спартакиада сүрүн судьуйата Ариан Тарасов, волейболга өрөспүүбүлүкэ сүрүн тренерэ, күрэхтэһии сүрүн судьуйата Константин Гаврильев эҕэрдэ тыллары этэн астылар.

Саха Өрөспүүбүлүкэтин үлэҕэ кэлэктииптэрин Комплекснай спартакиадаларын икки төгүллээх кыайыылаахтара физкултуура уонна спорт үлэһиттэрин 100-чэкэ оонньооччулардаах дьахталларга уонна эр дьоҥҥо тоҕустуу хамаандалара икки бөлөххө хайдыһан, үс балаһаакканан күрэхтэстилэр. Икки күннээх киирсиилэр түмүктэринэн  дьахталларга Айыына Жерготова, Екатерина Попова, Изабелла Массаева, Лилия Петрова, Ольга Николаева, Сардаана Прокопьева, Клавдия Павлова, Раиса Негнюрова састааптаах уонна эр дьоҥҥо Айсен Жерготов, Семен Ядрихинскай, Николай Кейментинов, Владислав Попов, Семен Васильев, Павел Обутов, Эдуард Дьяконов оонньооччулардаах намнар бастаатылар, дьахталларга физкултуура уонна маассабай спорт управлениета – иккис, “Эллэй Боотур” (кыһыҥҥы көрүҥнэр), “Чолбон” (харбааһын) холбоһуктаах хамаандалара – үһүс; эр дьоҥҥо “Триумф” (сүүмэрдэммит хамаанданы бэлэмниир киин) – иккис, физическэй култуура уонна спорт управлениета үһүс бириистээх миэстэлэргэ тигистилэр.

Семен Васильев (Нам), Айыына Жерготова (Нам) – “Бастыҥ кимээччи”, Денис Шестаков (“Триумф”), Тамара Аммосова (маассабай спорт управлениета) – “Бастыҥ көмүскээччи”, Гаврил Захаров (маассабай спорт управлениета), Наталия Иванова ( “Эллэй Боотур”, “Чолбон”) “Туһалаах оонньооччу” анал бириистэринэн биһирэннилэр.

Нам хамаандатын хапытаана, Олимпийскай эрэл оҕо спортоскуолатын волейболга салаатын сүрүн тренерэ Айсен Жерготов: “Волейболга аналлаах оскуолалаах буоламмыт, кыайыахтаахпытын кыайдыбыт. Фавориттар этибит. Волейбол тренердэрэ бэйэлэринэн оонньооннор, оонньуу хаачыстыбатын тупсаран биэрдилэр. Салайааччыларбыт спортоскуолабыт дириэктэрэ Семен Ядрихинскай, үөрэххэ дириэктэри солбуйааччы Раиса Негнюрова хамаандабыт түмсүүлээҕин көрдөрдүлэр, үс тренер хаачыстыбаны тупсардылар, атах оонньуутун маастара Владислав Попов төбөтүнэн сиэккэттэн быга сылдьан, эдэр тренер Семен Васильев, өрөспүүбүлүкэ чөмпүйүөнэ Павел Обутов кыахтаахтык оонньоотулар.

Эр дьон финаллара сүрдээх сытыытык ааста. Маҥнай утаа намнар кыайалларыгар бүк эрэл баара. Дэлэҕэ, биир да хотторуута суох иһэр Нам хамаандатын сүрүн тренерэ Айсен Жерготов: “Туох айылаах чуумпутай?” – диэн бэркиһээн саҥа аллайыа дуо? Ону эрэ күүппүт курдук “Триумф” хамаандатын салайааччыта, көҥүл тустууга ССРС үс төгүллээх призера Михаил Ноговицын ыһыытаан-хаһыытаан, ыйан-кэрдэн, хамаандалаан, оонньуу күүрээнин үрдэттэ. Өрөспүүбүлүкэ таһымнаах оонньооччу, Амма волейболга оскуолатын иитиллээччитэ Денис Шестаков күүстээх охсууларынан биир партияны ылан, сэргэхсийии буола сырытта. Намнар бодолорун тардынан, хомуллан оонньооннор, кыл-мүччү кыайдылар. Чахчы кыраһыабай киирсии буолла!

Физкултуура уонна спорт үлэһиттэрин Комлекснай спартакиадалара бу сыл ахсынньы ыйыгар түмүктэниэҕэ.