VIII-с «Азия оҕолорун» факела, көстүүмнэрэ сиэдэрэйдэр!

Кулун тутар 19 күнүгэр “Өлүөнэ очуостара” национальнай пааркаҕа быйыл Дьокуускайга буолар VIII-с “Азия оҕолоро” Норуоттар икки ардыларынааҕы  спортивнай оонньуулар (НИСО) уоттарын ылыы үөрүүлээх быһыыга-майгыга ыытыллыаҕа. Оонньуулар факелларын уонна көстүүмнэрин сүрэхтэниитэ Ю.А. Гагарин аатынан Аныгы култуура уонна искусство киинигэр буолан ааста.

Иккис этээскэ баар кэҥэс саала сценатын ортотугар анал постамеҥҥа факел туруоруллубут. Кыһын, саас, сайын кэтиллэр спортивнай таҥастаах уолаттар, кыргыттар помоска бэрт чэпчэкитик туттан-хаптан хаамыстылар. Күн-дьыл араас тургутуутун тулуйар матырыйаалтан оҥоһуллубут көстүүмнэр кэтэ сылдьарга чэпчэкилэр, табыгастаахтар. Сырдык халлаан күөҕэ уонна оранжевай өҥнөөх хахсаат тыалтан көмүскэнэр ветровка, футболка, куурка, халыҥ уонна чараас бүрүүкэлэр, үрүҥ хаймыылардаах, хара өҥнөөх кроссовкалар болҕомтону тартылар. Кууркалар сахалар ытык көтөрдөрүн кыталык кынатын санатар маҕан сурааһыннардаахтар.

Факел алюминийтан оҥоһуллубут, Сахабыт сирин кэрэ айылҕатын көрдөрөр халлаан күөҕэ, аар тайҕалыы от күөҕэ, чэбдик ыраас салгыныныы үрүҥ өҥнөрө бэйэ-бэйэлэрин бэрт тупсаҕайдык ситэрсэн-толорсон биэрэллэр.  Факел ыйааһына 1,8 кг, чэпчэки, айаҥҥа тута сылдьарга табыгастаах.

“Азия оҕолоро” НИСО кэмитиэтин бэрэсидьиэнэ  Владимир Максимов уонна Дирекциятын генеральнай дириэктэрэ Михаил Сивцев суруналыыстар ыйытыыларыгар хоруйдаатылар.

Былаан быһыытынан, факел эстафетата өрөспүүбүлүкэбит улуустарын, оройуоннарын ытык, кэрэ, норуот хаһаайыстыбатын сайдыытын историятын көрдөрөр сирдэринэн сылдьар, көрдөрөр сыаллаах-соруктаах. Оттон факелы тутар чиэскэ Сахабыт сирин 550 бастыҥ спортсмена, өрөспүүбүлүкэ сайдыытыгар кылааттарын киллэрбит бочуоттаах дьон тиксиэхтэрэ. Улуустар факелы тутар чиэскэ кимнээх тиксэллэрин бэйэлэрэ быһаараллар, бэлэмнииллэр. Уот эстафетата 100 күн устата Сахабыт сирин устун уһаты-туора 35 тыһ. км айанныаҕа.

“Азия оҕолоро” НИСО курдук киһи аймах биир сырдык, чаҕылхай уонна кэрэ бырааһынньыгын үрдүк тэрээһиннээхтик ыытарга модун Арассыыйа, тапталлаах Сахабыт сирэ күргүөмнээхтик бэлэмнэнэллэр.