VI-с муус уонна хаар оҥоһуктарга аһаҕас күрэх кыайыылаахтара ааттаннылар

М.П. Максимов аатынан «Мы – дети Севера» VI-с муус уонна хаар оҥоһуктарга аһаҕас күрэх быйыл олунньу 27 – кулун тутар 1 күннэригэр киин куораттааҕы «Северное сияние» муус, хаар оҥоһуктар пааркаларыгар буолан ааста.

Тэрийээччилэр быйылгы күрэҕи Арассыыйаҕа буола турар Дьиэ кэргэн уонна Саха Өрөспүүбүлүкэтигэр биллэриллибит Оҕо саас сылларыгар анаатылар. Онон күрэххэ учууталлаах үөрэнээччиттэн турар хамаандалары сэргэ быйыл аан бастаан дьиэ кэргэнинэн кытыннылар. Оттон күрэххэ уопсайа 15 хамаанда кыттыыны ылла: Дьокуускай куораттан 11 хамаанда, Таатта улууһуттан икки хамаанда уонна биирдии хамаанда Мэҥэ Хаҥалас уонна Нам улуустарыттан.

Олохтоох дьаһалта аатыттан Култуура уонна Духуобунас управлениетын салайааччыта Индира Ли күрэх кыттыылаахтарыгар туһаайан: «Хас да күн аһаҕас халлаан анныгар үлэлиири тулуйаҥҥыт, кыайыыга дьулуургутун көрдөрдүгүт, онон бүгүн эһиги бары кыайыылаах үрдүк аатын ыллыгыт»,– диэн бэлиэтээтэ.

Түмүккэ муус оҥоһуктарга алын бөлөххө кыайыылааҕынан Дьокуускай куораттан Софья Колотухина уонна Александр Присяжнай, Л.А. Ким аатынан оҕо искусствотын оскуолата, «Большой улов» үлэлэринэн таҕыстылар.

Улахан бөлөххө муус оҥоһуктарга 1 миэстэ хаһаайыннарынан Тааттаттан Саян Атастыров уонна Кузьма Кузьмин, Тааттатааҕы «Эрэл» айар киин, «Бастакы балык» үлэлэринэн ааттаннылар.

Хаар оҥоһукка дьиэ кэргэн күрэҕэр кыайыылаах үрдүк аатын Намтан Анатолий Васильевич, Нюргуяна Михайловна уонна уоллара Эрсан састааптаах Аргуновтар иллээх хамаандалара «Уу-чукучук» үлэлэринэн ыллылар.

Тэрийээччилэр, Олохтоох дьаһалта Култуураҕа уонна духуобунаска управлениета уонна «Северное сияние» хаар-муус оҥоһуктар пааркалара, «Водоканал» АУо, «Якутский Фонд недвижимости» Өрөспүүбүлүкэтээҕи ипотека хампаанньатыгар, «Полярные авиалинии» авиахампаанньаҕа махталларын тиэрдэллэр, диэн иһитиннэрэр Олохтоох дьаһалта пресс-сулууспата.