Уустук балаһыанньаҕа түбэспит дьоҥҥо гуманитарнай көмө оҥоһуллар

Дьокуускайга «Импульс» VII-с норуоттар икки ардыларынааҕы ыччат форумун чэрчитинэн, олунньу 28 күнүттэн кулун тутар 1 күнүгэр диэри, уустук балаһыанньаҕа түбэспит гражданнарга уонна дьиэ кэргэттэргэ  гуманитарнай көмө оҥоһуллар диэн Биир кэлим ресурснай киин пресс-сулууспата иһитиннэрдэ.

Форум сүрүн тиэмэтинэн Саха сиринээҕи туризм уонна ыалдьытымсах буолуу эйгэтигэр волонтердааһын буолар. Тэрээһин кыттааччылара туризм сайдыытын хаамыытын кытта билсиэхтэрэ. Биир кэлим ресурснай киин экспертэрэ социальнай бырайыактары гырааннар өйөбүллэринэн олоххо киллэрии туһунан кэпсиэхтэрэ. «Импульс» бочуоттаах ыалдьыттарынан «Ыалдьытымсах буолуу волонтердара» Арассыыйатааҕы хамсааһын салайааччыта, «Креативнай кластер» АНО дириэктэрэ Елена Козак уонна норуоттар икки ардыларынааҕы спикер, «Ситиһиилээх толкуй» бырайыак төрүттээччитэ уонна салайааччыта Павел Вербняк буолаллар.

Манна даҕатан эттэххэ, Арассыыйаҕа ыалдьытымсах буолуу волонтердарын хамсааһына 2019 сыллаахтан тэтимнээхтик сайдар. Хамсааһын – «Аан дойду волонтердара» федеральнай бырагыраама баһылыыр-көһүлүүр бырайыага.

Гуманитарнай көмөнү хомуйуу икки күн устата А.Е. Кулаковскай аатынан Норуоттар доҕордоһууларын дьиэтигэр ыытыллар. Киирбит көмө уустук балаһыанньаҕа түбэспит дьоҥҥо, итиэннэ анал байыаннай дьайыы кыттыылаахтарын дьиэ кэргэттэригэр тиксэриллиэҕэ. Ким баҕалаах саҥа таҥаһы-сабы, атах таҥаһын уонна туттар тэриллэри аҕалыан сөп, барыта үчүгэй туруктаах буолуохтаах.