Устудьуоннар этэрээттэрин байыастара оробуочай идэлэргэ босхо үөрэнэллэр

2023 сыл сааһыгар Хотугулуу-Илиҥҥи федеральнай университет 13 оробуочай идэҕэ устудьуоннары босхо үөрэтиигэ «Арассыыйатааҕы устудьуоннар этэрээттэрэ» ыччат уопсастыбаннай тэрилтэтин гранын ылбыта. Устудьуоннар маляр, сварщик, слесарь уонна да атын идэлэри баһылыахтарын сөп. 
ХИФУ медицинскэй институтун базатыгар 10 устудьуон «санитар» идэтигэр үөрэнэн, туоһу сурук ылбыт. 
«Эбии үөрэхтээһин кууруһун ааһан, бэйэбэр олус элбэх сонуну биллим, саҥа үөрүйэхтэри иҥэринним. Университеппыт устудьуоннар  этэрээттэрин хамсааһыннарын өйүүр уонна маннык грантовай күрэхтэргэ кыттар буолан, биһиэхэ, устудьуоннарга, сүрдээх улахан өйөбүл. Мин бу сайын медицина этэрээтин кэккэтигэр үлэлиир былааннаахпын уонна ылбыт билиим үлэ кэмигэр наада буолуо диэн эрэнэбин», – диэн ХИФУ устудьуоннарын штабын байыаһа Вячеслав Атласов кэпсиир. 
Бэс ыйын устата устудьуоннар өссө атын идэлэргэ үөрэниэхтэрэ. Ол курдук: ньиэби уонна гааһы хостуур оператор, 3 разрядтаах сварщик, стропальщик уо.д.а. оробуочай идэлэргэ эбии үөрэхтээһин кууруһун ааһан, суолталаах эбийиэктэргэ уонна бырамыысыланнай хампаанньаларга үлэлиэхтэрэ.
«Үөрэҕи ааспыт оҕолор салгыы устудьуоннар тутар этэрээттэригэр үлэлиир былааннаахтар», – диэн ХИФУ устудьуоннарын этэрээттэрин штабыгар иһитиннэрэллэр. 
Бэлиэтээн эттэххэ, быйыл ХИФУ устудьуоннарын этэрээттэригэр 2700 байыас үлэлиэҕэ – сайыҥҥы сезоҥҥа 100 этэрээт араас хайысханан үлэлииргэ бэлэм олорор.