Урбаанньыттары «Үлэ сайына – 2023» күрэххэ ыҥыраллар 

Дьокуускай куорат Олохтоох дьаһалтатын урбааҥҥа, потребительскай ырыынакка уонна туризмы сайыннарыыга департамена урбаанньыттары «Үлэ сайына – 2023»/«Трудовое лето – 2023» күрэххэ көхтөөх кыттыыны ыларга ыҥырар. 
Үлэ сылынан быйыл Саха Өрөспүүбүлүкэтигэр оскуола үөрэнээччилэригэр уонна ыччаттарга үс, ол иһигэр «Үлэ  сайына – 2023» муниципальнай таһымнаах бырагыраама үлэлиир.
1 бырагыраама – судаарыстабаннай. Бу бырагыраамаҕа бас билии көрүҥүттэн тутулуга суох бары тэрилтэлэр кыттар кыахтаахтар – бүддьүөт, федеральнай, хозрасчетнай, чааһынай, кэмиэрсийэтэ суох, маны сэргэ биирдиилээн урбаанньыттар. Үлэни биэрээччи хамнастаһыан баҕарар оҕону кытта дуогабар түһэрсэр уонна оҕоҕо үлэлээбит бириэмэтинэн хамнас төлүүр: 1 чааска 15-16 саастаах оҕо Дьокуускай куоракка МРОТ уонна тэрилтэҕэ РК кээмэйиттэн быһа холоон 237-288 солк. төлүүр, 16-18 саастаах оҕоҕо – 162-197 солк. 
2 бырагыраама – федеральнай. Бу бырагыраамаҕа судаарыстыбаннайа суох тэрилтэлэр уонна муниципальнай юридическай сирэйдэр, ИП уонна НКО кытталлар. Бырагыраама быһыытынан 16-тан 30 диэри саастаах ыччаты толорута суох үлэ күнүгэр ылаллар. 
3 бырагыраама – муниципальнай. Судаарыстыбаннайа суох уонна муниципальнай юридическай сирэйдэр уонна ИП, НКО кытталлар. Бу бырагыраама олох очуругар оҕустарбыт саастарын ситэ илик оҕолору хамнастыырга туһуланар.
Оҕону үлэҕэ ылар тэрилтэлэр Работа России федеральнай порталга тус кабинеттаах, Дьарыктаах буолуу киинин кытта дуогабардаах буолуохтаахтар. Бирикээс, дуогабар, таабыл куоппуйатын электроннай почта нөҥүө ыытыллар. Ол туһунан сиһилии «Работодатели г. Якутска» телеграм-ханаалга билсиэххэ наада.
Бэлиэтээн эттэххэ, саастарын ситэ илик оҕолору үлэҕэ ылар тэрилтэлэргэ судаарыстыба өттүттэн өйөбүл көрүллэр. Чуолаан, Дьарыктаах буолуу кииниттэн хас биирдии оҕоҕо хамнаһыгар эбии 5915 солк. кээмэйдээх материальнай көмө оҥоһуллар.