Урбаан эйгэтэ хаачыстыба да, үбү киллэрии да өттүнэн сайдар

Былырыыҥҥыттан куорат баһылыга нэһилиэнньэни сэргэ үлэ кэлэктииптэрин иннигэр отчуоттуур үтүө үгэһэ олохтонно. Ол курдук, олунньу 13 күнүгэр Евгений Григорьев «Хозмаркет» маҕаһыыннар ситимнэрин кэлэктиибин кытта көрүстэ.

Көрсүһүү кыттыылаахтарын Евгений Григорьев дойду бэрэсидьиэнэ Владимир Путин биһирэбилин ылбыт Дьокуускай куорат 2030 сылга диэри сайдыытын маастар-былаанын, 2023 сыл социальнай-экономическай ситиһиилэрин кытта билиһиннэрдэ.

Үүммүт 2024 сыл соруктарыгар урбаан, үөрэхтээһин, суол тутуутун, уопсастыбаннай тырааныспар эйгэлэрин сайыннарыы, саахалланар туруктаах хаарбах дьиэлэртэн көһөрүү, куорат туоналарын тупсарыы, нэһилиэнньэ физическэй култууранан уонна спордунан дьарыктаныытын өйөөһүн, тыа хаһаайыстыбатын кыһалҕаларын быһаарыы, куорат инфраструктуратын тупсарыы, арыгыны утары политиканы күүһүрдүү, анал байыаннай дьайыы кыттыылаахтарыгар уонна кинилэр дьиэ кэргэттэригэр социальнай өйөбүл миэрэлэрин кэҥэтии уонна хаачыстыбатын үрдэтии курдук соруктар туралларын бэлиэтээтэ.

Куораты сайыннарыыга урбаан эйгэтэ сүҥкэн кылаатын бэлиэтээн туран, ааспыт 2023 сылга биирдиилээн атыыттан 190 млрд солк. кэриҥэ иэннээх рекорднай суума ситиһиллибитин, ол иһигэр 19 млрд солк курдук харчыны аҥаардас уопсастыбаннай аһылык тэрилтэлэрэ оҥорбуттарын иһитиннэрдэ. Урбаан эйгэтин биир таһаарыылаах, үрдүк көрдөрүүлээх хайысхатынан тутууну ааттаата. «Онон биһиги куораппытыгар урбаан эйгэтэ хаачыстыба да, үбү-харчыны оҥоруу да өттүнэн тэтимнээхтик сайдар»,- диэтэ Евгений Григорьев.

Баһылык отчуотун истэн баран «Хозмаркет» үлэһиттэрэ оптуобустар схемаларын тупсарар наадатын ыйдылар, киэһэ хойукка диэри үлэлииллэрин ситиһэргэ көрдөстүлэр, бөҕү наардааһыны, элбэх оҕолоохторго сири биэрии хаамыытын, 203-с түөлбэҕэ киирэр-тахсар суолу элбэтэри эттилэр. Маны сэргэ Семен Данилов, 17/3 аадырыска турар хаарбах дьиэттэн көһөрүү, «Саталга» оскуола уонна оҕо уһуйаанын тутуу болдьохторугар, сөмөлүөт билиэтин сыанатын аччатыыга сыһыаннаах ыйытыылары биэрдилэр.