Уопсастыбаннай палаата састааба саҥардыллыаҕа

Дьокуускай куорат Уопсастыбаннай палаататын састааба саҥардыллыаҕа диэн иһитиннэрдэ бэрэссэдээтэл Матвей Лыткин.

Састаабы саҥардыы палаата түөрт чилиэнэ Дьокуускай куораттааҕы Дуумаҕа талыллыбыттарынан сибээстээх. Ити – Горбунова Нина Виссарионовна (Биир Ньыгыл Арассыыйа), Луковцева Наталья Викторовна (Биир Ньыгыл Арассыыйа), Седых Филипп Сергеевич (самовыдвиженец), Чудиновских Александр Владимирович (Биир Ньыгыл Арассыыйа).

«Куорат Дууматын састаабыгар киирбит кэллиэгэлэрбитин ис дууһабытыттан эҕэрдэлиибит. Кинилэргэ ситиһиилээх үлэни баҕарабыт. Дьокутааттарынан Уопсастыбаннай палаата саамай көхтөөх чилиэннэрэ буоллулар. Кинилэр Дуумаҕа олус туһалаах буолуохтара диэн эрэнэбин», - диир Матвей Лыткин.

Билигин Уопсастыбаннай палаата састаабын саҥардар сорук турар. Саҥа талыллар түөрт чилиэни икки сылга болдьохтоон аныыллар, билиҥҥи састаап номнуо биир сыл үлэлээтэ. Хандьыдааттар билиннэхтэринэ мунньах ыытыллара чопчуланыаҕа. Палаата чилиэнэ буолуон баҕарааччылартан сайаапкалары Олохтоох дьаһалта 503-с кэбиниэтигэр күүтэллэр.