21.10.2023 | 14:00

Умнуллубатын устудьуон сэргэх олоҕо!

Умнуллубатын устудьуон  сэргэх олоҕо!
Ааптар: Айталина Софронова
Бөлөххө киир

Үөрэх дьыла саҕаламмыта номнуо балтараа ый ааһа оҕуста. Билигин бастакы куурус устудьуоннара бэйэ-бэйэлэрин кытта билсэр-көрсөр, ханна кэлбиттэрин өйдүүр, саҥа сиргэ “сүрэхтэнэр”, быһаччы эттэххэ, тургутууну ааһар кэмнэрэ.
Биһиги бүгүҥҥү нүөмэрбитигэр үрдүкү куурус устудьуоннарыттан үөрэх, дьарык туһунан ыйыталастыбыт, таарыйа маҥнайгы кууруска киирбит оҕолорго анаан тэттик сүбэлэри хомуйдубут.

Ньургуйаана Пинигина, ХИФУ педагогическай институтун иккис кууруһун устудьуона:

— Үөрэх бастакы ыйа ыарахан соҕустук ааспыта, эмискэ баҕайы элбэх баҕайы  паара турбут этэ. Эбиитин курсовой үлэҕитин саҕалыыгыт уонна быраактыкаҕытын көмүскүүгүт диэбиттэрэ.

Хас биирдии устудьуон үөрэҕи таһынан дьарыктаах буоларга дьулуһар. Мин ХИФУ ДНД-тын дружинатын байыаһа буолабын уонна тутар этэрээккэ киирбитим. Онтон атын эбии дьарыкка суруйтарбатаҕым, бириэмэ даҕаны ыгым курдук.

Устудьуоннуур сылларбыттан дьоллоох, умнуллубат элбэх түгэни кэтэһэбин. Үөрэхпин ситиһилээхтик бүтэрэн, үлэһит буоларбын күүтэбин уонна, биллэн турар, эрэллээх доҕоттору көрдүүбүн. Хомойуох иһин, биир даҕаны тэрээһиҥҥэ кытта иликпин.

Ситиһии төрдө, мин санаабар, киһи бэйэтин бириэмэтин хайдах аттарынарыттан, мотивациятыттан уонна баҕатыттан эрэ тутулуктаах. Маҥнайгы куурус оҕолоругар сүбэлиэм этэ: кыбыстымаҥ, дьоҥҥо-сэргэҕэ аһаҕас буолуҥ уонна иллэҥ кэмҥитин туһалаахтык атаарыҥ.

 

Сайана Олесова, ХИФУ естественнэй наукалар институтун үһүс кууруһун  устудьуона:

— Үөрэх бастакы ыйа миэхэ олус үчүгэйдик уонна чэпчэкитик ааста. Быйылгы сылга бадминтон секциятыгар киирдим. Устудьуоннуур сылларбыттан элбэх умнуллубат түгэннэри, эрэллээх доҕоттору күүтэбин.

Ситиһии улахан үлэттэн кэлэр дии саныыбын. Ол иһин күүстээх санаалаах, туохтан да толлубакка инниҥ диэки баран иһиэххэ наада.

Александр Ноговицын,  ХИФУ геолого-разведочнай факультетын үһүс кууруһун устудьуона:

— Балаҕан ыйа олус судургутук ааста, саҥа дисциплиналары ыарырҕаппакка ылынным. Мин эмиэ уопсастыбаннай үлэттэн, түмсүүттэн туора турбат устудьуоммун.  Былырыыҥҥыттан «Саха сирин улуустарын ыччаттарын түмсүүлэрин холбоһугар», «ZEMA»-ҕа актыбыыстыыбын. Балтараа сыл устата Кэбээйи улууһун эдэр ыччат “Дабаан”  түмсүүтүгэр салайааччылаатым. Билигин “ZEMASAKHA” салайааччытын аппараатын састаабыгар баарбын уонна киин улуустар түмсүүлэрин холбоһугун куратора буолабын. Өрөспүүбүлүкэ хас биирдии муннугуттан кэлэр ыччаты барытын түмэр, устудьуон сылларын умнуллубаттыы атаарарга көмөлөһөр, сөптөөх суолу ыйар, улуустар икки ардыларыгар ил-эйэ төрүттүүр тэрилтэҕэ баарбыттан киэн туттабын уонна онтон олох кэмсиммэппин.

Устудьуон сылларбар төһө кыалларынан элбэх доҕордонон, умнуллубат мүччүргэннээх сырыыланан, талбыт идэбэр сыһыаннаах билии иҥэринэн, кырдьар сааспар кэлэн: “Устудьуоннуур сылбар маны гыммаккабын, сыыстарбыппын” – диэн санааҕа ылларбат курдук атаарыахпын баҕарабын.

Мин санаабар, ситиһии төрдө – бэйэни кыайыыга. Туохтан да толлубакка, кыбыстыбакка, саҥаттан саҥаҕа холонон, үөрэнэн, төһө кыалларынан элбэх араас дьону кытта кэпсэтэн-ипсэтэн, уопут үллэстэн, бу сиргэ бары барытын ситиһиэххэ сөп дии саныыбын. Маҥнайгы куурустарга уонна доҕотторбор этиэм этэ: устудьуон сылларгыт хас биирдии түгэнин сыаналааҥ, харыстааҥ. Олоххутугар саамай умнуллубат, чугас доҕоттору бэлэхтиир кэмҥит буоларын өйдөөҥ. Маны ааҕар усутудьуоннары барыларын Zema-ҕа күүтэбит, биир дойдулаахтаргытын, өрөспүүбүлүкэбит хас биирдии муннугуттан кэлбит оҕолору кытта билсэ-көрсө, сынньана, дойдугут сайдарын туһугар үлэлии киирэргитигэр ыҥырабын, кэмсиниэ суоххут диэн этэбин!

Арсен Кривошапкин, ХИФУ автодорожнай факультет иккис кууруһун устудьуона:

— Мин Уус Алдан улууһун Найахы нэһилиэгиттэн сылдьабын. Үөрэх маҥнайгы ыйа олус түргэнник ааста. Устудьуон буоларым быһыытынан, уопсастыбаннай хамсааһыннартан туора турбаппын. 2021 сылтан «ZEMA» өрөспүүбүлүкэтээҕи ыччат уопсастыбаннай тэрилтэтин актыбыыһабын.

Устудьуоннуур сылларбыттан элбэх өйгө-сүрэххэ хаалар бэлиэ түгэннэри күүтэбин, эрэллээх доҕоттору булуохпун уонна саҥаны-сонуну билиэхпин, сири-дойдуну көрүөхпүн наһаа баҕарабын. Хата, манна туһааннаах биһиэхэ араас үөрэх куурустара бааллар.

Быйылгы үөрэх дьыла саҕаланыаҕыттан син элбэх тэрээһиҥҥэ сырыттым. Холобур, «Вливайся», “День первокурсника» уонна дьаарбаҥкаларга.

Бастакы куурус устудьуоннарыгар холку, элэккэй буолуҥ, ону таһынан үөрэх күннэрин олох көтүтүмэҥ диэн сүбэлиибин.

Петр Слепцов,  ХИФУ инженернэй-техническэй институтун иккис кууруһун устудьуона:

— Бэйэм Дьааҥы улууһун Табалаах нэһилиэгиттэн сылдьабын. 2000 сыллаахха балаҕан ыйын 17 күнүгэр бастакы оҕонон күн сирин көрбүтүм, бииргэ төрөөбүт үспүт – Яна уонна Катя диэн икки балтылаахпын. Ийэм Анна Петровна, аҕам Сергей Гаврильевич тыа хаһаайыстыбытын үлэһиттэрэ. Мин АГАТУ-тан ХИФУ көһөн кэлбитим, үөрэҕим син ыарахан соҕус да буоллар, инникитин туһалаах буолар ини диэн эрэнэбин.

Үөрэҕим таһынан университет олоҕор көхтөөхтүк кытта сатыыбын, буолар тэрээһиннэргэ туора турбакка, куруук үөрүүнү кытта туох баарынан түһүнэн иһэбин. Мин санаабар, усутудьуон үөрэҕинэн эрэ муҥурдаммакка, уопсастыбыннай үлэнэн дьарыктаныахтаах. Холобур, «ZEMA» өрөспүүбүлүкэтээҕи ыччат уопсастыбаннай тэрилтэтигэр бу күҥҥэ диэри актыбыыстыы сылдьабын. Бу түмсүүгэ эдэр саас тыына, умнуллубат кэрэ кэмнэрэ бааллар.

Ситиһии элбэх үлэ, билии-көрүү кэннэ кэлэр. Ол инниттэн билиибитин куруук кэҥэтэ сылдьыахтаахпыт. Маҥнайгы куурустарга этиэм этэ, чөл олоҕу тутуһуҥ, эдэр сааскытын умнуллубаттык атаарыҥ.

Валерий Иванов, ХИФУ физкультурнай салаатын иккис кууруһун устудьуона:

— Мин Үөһээ Бүлүү улууһун Өргүөт нэһилиэгиттэн сылдьабын. Үөрэх бастакы ыйа этэҥҥэ ааста. Иккис сылбын «ZEMA» өрөспүүбүлүкэтээҕи ыччат уопсастыбаннай тэрилтэтин актыбыыһа буолабын. «ZEMA-лар» буолан быйыл күһүн араас тэрээһиннэри ыыттыбыт. Ол курдук ыччаттар икки ардыларыгар «Сүрэхтэнии”, “Ил-Эйэ” диэн доҕордоһуу киэһэлэрэ буолан ааспыттара. Бэйэм оскуолаҕа үөрэнэр сылларбыттан хапсаҕайдыыбын, билигин да утумнаахтык дьарыктанабын.

Устудьуоннуур сылларбыттан элбэх эрэллээх доҕоттору, умнуллубат түгэннэри күүтэбин.

Төһөнөн кыһаллаҕын, сүүрэҕин-көтөҕүн, хамсанаҕын да, оччонон ситиһии кэлэр дии саныыбыт. Устудьуоннарга үөрүү-көтүү аргыстаах, мэлдьи инники күөҥҥэ сылдьаргытыгар, туохтан да чаҕыйбакка олох устун баран иhэргитигэр баҕарабын!

Сонуннар

Ордук ааҕаллар

Дрону күрдьэҕинэн суулларбыт саха буойуна
Дьон | 16.05.2024 | 14:00
Дрону күрдьэҕинэн суулларбыт саха буойуна
Нэдиэлэ аайы саҥаттан саҥа киһини билсэр, салгыы кинини кытта сибээһи тутар, суруйсар суруналыыс идэлээх киһи үлэтин биир эмиэ интэриэһинэй өрүтэ. Мин анал байыаннай дьайыыга сылдьар суруйбут, ааҕааччы киэҥ эйгэтигэр таһаарбыт уолаттарбын үгүстэрин билсэбин, ыйыталаһабын, ханна тиийбиттэрин, сылдьалларын сураһабын, хомойуох иһин, сорохторун сүтэрэбин...   Хачыгаардыы сылдьан бэбиэскэ туппутум Анал байыаннай дьайыыга мобилизация...
Татьяна Иванова:  «Дьол уйатын ытыктабыллаах сыһыан эрэ тутар»
Дьон | 16.05.2024 | 16:00
Татьяна Иванова: «Дьол уйатын ытыктабыллаах сыһыан эрэ тутар»
Арассыыйаҕа Дьиэ кэргэн сылынан уонна Дьиэ кэргэн аан дойдутааҕы күнүгэр сөп түбэһиннэрэн, таптал кыымыттан саҕыллан биэс уон биэс сыл бииргэ олоруу дьолун билбит Татьяна, Петр Ивановтар дьиэ кэргэн туһунан сырдатабын.   Киһи төрүүрүгэр олоҕо барыта үөһэттэн суруллан кэлэр ыйаахтаах, ол  сиэринэн оҕо, ыччат буола үүнэн, сирдээҕи тапталы көрсөн, ийэ, аҕа дьолун...
Дархан этээччи Валентин Хорунов:  «Саха оһуохайа аан дойду дьонун түмүөҕэ...»
Дьон | 23.05.2024 | 10:00
Дархан этээччи Валентин Хорунов: «Саха оһуохайа аан дойду дьонун түмүөҕэ...»
Былырыын балаҕан ыйын 7 күнүгэр Саха Өрөспүүбүлүкэтин Ил Дархана Айсен Николаев Оһуохай күнүн олохтуур туһунан Ыйаахха илии баттаабыта. Дьэ, ол үөрүүлээх күммүт – ыам ыйын 25 күнэ үүнэрэ икки хонук хаалла.  Бүгүҥҥү нүөмэрбит ытык-мааны ыалдьыта – Саха Өрөспүүбүлүкэтин Дархан этээччитэ Валентин Хорунов.   Дьуохар биһигэр улааппыт дьоллоохпун – Валентин Васильевич, саха...
Оҕуруотчут кистэлэҥнэрэ
Тускар туһан | 23.05.2024 | 18:00
Оҕуруотчут кистэлэҥнэрэ
Кылгас, ол эрээри өҥүрүк куйаас сайыннаах Сахабыт сиригэр эгэлгэ сибэккилэри, оҕуруот аһын арааһын үүннэрэн ылабыт. Сылтан сыл аайы соҕуруу дойдуга силигилии үүнэр сонун үүнээйилэр көрүҥнэрин олордон,  тиэргэммит, дьиэбит  кэрэ көстүүлэнэр, ону тэҥэ оҕуруот аһыттан, отонноох талахтартан кэнсиэрбэлэри, хомпуоттары оҥосторбут элбээтэ.    Бастыҥ тиэргэннээх  хаһаайка Мин бүгүн сайыҥҥы сырал күннэргэ ис сүрэхтэн...