Улуустарга коронавируһу кытта охсуһуу күүһүрэр

Ил Дархан Айсен Николаев улуустар баһылыктарыгар коронавирус дьаҥын кытта охсуһууну күүһүрдэргэ сорудахтаата. Бу туһунан Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
«Оройуоннарга гражданнары ревакцинациялааһыны күүһүрдэр булгуччулаах.  Бүгүҥҥү күҥҥэ ревакцинация намыһах тэтимэ 47%-48% Нерюнгри, Алдан, Өймөкөөн оройуоннарыгар уонна Дьокуускайга көстөр. Өрөспүүбүлүкэ үрдүнэн кэлэктиип иммунитета 70% тиийбитэ ревакцинация күүһүрбэтэҕинэ намтыан сөп», – диэн этэр Ил Дархан.
Итини кытта улуус баһылыктарын иннигэр амбулаторнай көрүҥүнэн эмтэнэр ыарыһахтары босхо эминэн хааччыйыы, амбулаторияларга элбэх киһи мустарын таһаарбат буолуу, колл-кииннэр харгыһа суох үлэлэрин тэрийии, наада буоллаҕына волонтердары үлэлэтии соруктара тураллар. 
«Дьон, омикрон-штамм чэпчэкитик ааһар үһү диэн, ыарыы сибикитэ билиннэҕинэ даҕаны медицинскай көмөнү көрдөөбөттөр, бэйэлэрэ эмтэнэ сатаан ыарыыны баалатан кээһэллэр. Омикроны кытта өссө уустук көрүҥнээх  дельта-штамм баарын туһунан дьоҥҥо тиэрдиэххэ наада», – диир Айсен Николаев.
Кэнники күннэргэ Саха сиригэр, ыарыы балысханнык үрдээн баран, 40% аччаан эрэрэ көстөр. Бастакы уочарат, итинник көстүү Дьокуускайга ыарыы 57,5% намтаабытын кытта сибээстээх. Ыалдьыбыт түбэлтэлэртэн аҥаардара улуус өрөспүүбүлүкэлэригэр тахсар.