Улуу Кыайыы 78 сылынан 78 паара Кыайыы вальсыгар эргийдэ

Киин куорат үҥкүү кэлэктииптэрин кыттыылаахтара 78 паара бэҕэһээ, ыам ыйын 8 күнүгэр, Улуу Кыайыы 78 сылынан Кыайыы вальсыгар эргийдэ. Ураты тэрээһин Кыайыы болуоссатыгар Галина Кривошапко аатынан СӨ филармониятын солиһа Леонид Анциферов толоруутугар «Майский вальс» ырыанан доҕуһуолланна.
«Кыайыы вальса» үгэс буолбут бырайыак көҕүлээччитинэн «Мозаика» үҥкүү ансаамбылын салайааччыта Михаил Сивцев буолар, тэрийэн ыытааччы - Олохтоох дьаһалта Култуураҕа уонна духуобунай сайдыыга управлениета.
Быйылгы аахсыйаҕа киин куорат үөрэҕин кыһаларын үҥкүү кэлэктииптэрэ, Хотугулуу-Илиҥҥи федеральнай университет, Арктикатаҕы судаарыстыбаннай култуура уонна искусство института, С. Зверев - Кыыл Уолун аатынан Национальнай үҥкүү тыйаатыра, СӨ Үҥкүү спордун уопсастыбаннай тэрилтэтэ кыттыыны ыллылар.