Улаханнык ытыктыыр, куруук күндүтүк саныыр, сүгүрүйэр тапталлаах салайааччыбыт, тыйаатырбытын төрүттээччи, тэрийээччи Матрена Степановна!
![Улаханнык ытыктыыр, куруук күндүтүк саныыр, сүгүрүйэр тапталлаах салайааччыбыт, тыйаатырбытын төрүттээччи, тэрийээччи Матрена Степановна!](https://kiinkuorat.ru/wp-content/uploads/2024/07/FuXhdVjaRO.jpg)
Күн сирин көрбүт өрөгөйдөөх үбүлүөйдээх күҥҥүнэн, сүрэхпит долгуйар үөрүүтүгэр уйдаран, сүһүөхтээх бэйэбит сүгүрүйэн туран, хоолдьуктаах бэйэбит хоҥкуйан итиитик-истиҥник эҕэрдэлиибит! Айыыһытыҥ аргыстаһан, иэйиэхситиҥ сэргэстэһэн эйигин эргиччи араҥаччылаатыннар, күүскэр күүс, кыаххар кыах эптиннэр, үлэҕэр өссө үрдүктэн үрдүк ситиһиилэри аҕала турдуннар, дьиэ кэргэҥҥэр иллээх, эйэлээх олоҕу түстээтиннэр, баҕа санааҕын толоро турдуннар, ыра санааҕын ыпсаран истиннэр!
Ытык-мааны Матрена Степановна, Эн тыйаатырбыт сайдарын туһугар өр сыллаах кыһамньылаах, сыралаах, таһаарыылаах, ситиһиилээх үлэҕин сыаналыыбыт уонна Эйигиннэн киэн туттабыт! Бар дьоҥҥун түмэ тардан, сүбэлэрин холбоон, сатабыллаахтык салайар, тулуурдаах, хорсун майгыгар сүгүрүйэбит! Эн мындыр сүбэҕэр-амаҕар, кэскиллээх этиилэргэр, ыллыктаах тылларгар, истиҥ сыһыаҥҥар, үтүө холобургар, өрүү өйдүүргэр уонна өйүүргэр улаханнык махтанабыт!
Баҕарабыт эстибэт эрчими, чэгиэн-чэбдик туругу! Ситиһиилээх кэмнэр кэлэ турдуннар, үтүө түгэннэр үксүү турдуннар! Эдэрдии эйэҕэс санааҕынан, булгуруйбат сайаҕас толкуйгунан, соргулаах сүбэҕинэн, оҕоҥ, сиэннэриҥ истиҥ мичээрдэригэр, чугас дьонуҥ сылаас сыһыаныгар куустаран үгүс үөрүүлээх күннэн, уһун уруйдаах олохтон диэн алгыс бастыҥын аныыбыт! ДОМ! ДОМ! ДОМ! Өссө төгүл төрөөбүт күҥҥүнэн!
Бары үтүө баҕа санааны, алгыһы уонна улахан барҕа махталы кытта Саха Өрөспүүбүлүкэтин Үүнэр көлүөнэтин судаарыстыбаннай тыйаатырын бары дьоно-сэргэтэ
Сонуннар
Ордук ааҕаллар
![Түөһэйии элбээн иһэрэ дьиксиннэрэр...](/thumbnails/600/300/wp-content/uploads/2024/08/NNDIAGM5TA.jpg)
![Герман Отов: «Пригороднай аныгылыы улахан бөһүөлэк буолар чинчилээх...»](/thumbnails/600/300/wp-content/uploads/2024/09/inhECNdY5z.jpg)
![Баһылык Строительнай уокурук олохтоохторун кытта көрүстэ](/thumbnails/600/300/wp-content/uploads/2024/08/qRWAY5fveB.jpg)
![«Якутск вдохновляет» күрэххэ кыттыҥ!](/thumbnails/600/300/wp-content/uploads/2024/08/zc1WJpfgUt.jpg)