Аккырыыкката ыыт – чугас дьоҥҥор Саҥа дьыллааҕы настарыанньаны бэлэхтээ

«Кыһын Саха сириттэн саҕаланар» бэстибээл биир ураты тэрээһинэ – ким баҕалаах чугас дьонугар Чысхаан уонна Хаарчаана ойуулаах аккырыыкканы ыытан, саҥа дьыллааҕы настарыанньаны бэлэхтиир кыахтааҕа. 
Сэтинньи 29 күнүгэр бастакы аккырыыкканы Чысхаан уонна Хаарчаана Улуу Устюг куоракка Тымныы Оҕонньорго ыыттылар.
Дьокуускай куорат Олохтоох дьаһалтатын уонна Арассыыйа почтатын бу кыттыгас аахсыйалара «Кыһын Саха сириттэн саҕаланар» бэстибээл чэрчитинэн ахсынньы 1 күнүттэн саҕаланар.
Ол эбэтэр ким баҕалаах Главпочтамт дьиэтигэр (Дзержинскэй уул., 4) кэлэн, аккырыыккаҕа эҕэрдэтин суруйан, аадырыһын ыйан, маарка килиэйдээн баран, анал почта дьааһыгар уктаҕына, почта үлэһиттэрэ ону тустаахха тиэрдиэхтэрэ.
Аккырыыкка 6000 ахсаанынан бэчээттэммит, диэн иһитиннэрэр Олохтоох дьаһалта пресс-сулууспата.