«Кыһын Саха сириттэн саҕаланар» бэстибээл үөрүүлээх сабыллыыта хайдах ыытыллыаҕай?

Ол туһунан бэҕэһээ, сэтинньи 28 күнүгэр, куорат баһылыгын солбуйааччы Владимир Дорожкин «Якутия 24» тэлэбиидэнньэ ханаалын аһаҕас эпииригэр билиһиннэрдэ.

Бэстибээли үөрүүлээхтик түмүктүүр сүрүн тэрээһин ахсынньы 1 күнүгэр, бу өрөбүлгэ, «Триумф» спорт комплексыгар былааннанар.

Ол курдук, бырааһынньыктааҕы тэрээһиннэр күнүс 12 чаастан икки этээһинэн тэҥинэн саҕаланыахтара.
Аллараа этээскэ аренаҕа атыы дьаарбаҥката, «Бриллиантовые нотки» оҕо бэстибээлэ ыытыллыахтара, Иккис этээскэ «Зима fest» дьиэ кэргэн бырааһынныга күүтэр. Манна оҕолорго ойуулуктары көрдөрүөхтэрэ. кинигэ быыстапката, остуол оонньуулара, маастар-кылаастар ыытыллыахтара.
13.00 чаастан «Тоҥ балык 2024» күрэх былааннанар. Быйылгы күрэххэ 16 хамаанда ким түргэнник, кыраһыабайдык уонна хаачыстыбалаахтык тоҥ балыгы астыырга күрэхтэһээри бэлэмнэнэр. 

Бу кэнниттэн 17.00 чааска Орджоникидзе болуоссатыгар турбут саҥа харыйа уотун уматыы күүтүүлээх церемонията буолуоҕа. Харыйа уота сандаарбытын кэннэ 17.10 чаастан Кыайыы болуоссатыттан Доҕордоһуу болуоссатыгар диэри бырааһынньыктыы киэргэтиилээх массыыналар пробегтара саҕаланар.
Онон, 17:15 чаастан 17:45 чааска диэри Ленин проспега, 3 дьиэттэн Доҕордоһуу болуоссатыгар диэри тыраанспар бары көрүҥэр сырыы хаарчахтанар.