«МЭР» оонньуу быйылгы тиэмэтэ – патриотизм

МЭР – «Ыччат – Дьокуускай куораты сайыннарар күүс» – үгэс буолбут дьыалабыай оонньуу быйыл киин куоракка «Арассыыйа – мин историям» историческай пааркаҕа сэтинньи 29-30 күннэригэр буола турар.  
Быйылгы Оонньуу тиэмэтэ – патриотическай иитии. 
Дьыалабыай оонньуу кыттыылаахтарыгар бэйэтин эҕэрдэтин уонна баҕа санаатын куорат баһылыга Евгений Григорьев видеосибээһинэн тириэртэ.

«Дьокуускай куорат Олохтоох дьаһалтата, «МЭР» дьыалабыай оонньууну көҕүлээччи уонна тэрийээччи буоларын быһыытынан, күрэхтэһии хаамыытын кэтээн көрөрүн таһынан, хамаандаларга бары өттүнэн өйөбүлү оҥоруоҕа. Биһиги ыччаппат дойдуга таптал, ытыктабыл тыыныгар иитиигэ хорсун, сонун этиилэри киллэриэҕэ диэн эрэнэбин», – диэтэ Евгений Григорьев.
Куорат баһылыгын солбуйааччы – Олохтоох дьаһалта аппараатын салайааччыта Руслан Тимофеев бэлиэтээбитинэн, Оонньуу кэмигэр киирбит бастыҥ, интэриэһинэй этиилэр Олохтоох дьаһалта патриотическай иитиигэ былааныгар киирэн, куорат бүддьүөтүттэн үбүлэниэхтэрэ.
Санатар буоллахха, «МЭР» дьыалабыай оонньуу ыччаты көхтөөх гражданскай позициялаах буоларга иитэр, диэн иһитиннэрэр Олохтоох дьаһалта пресс-сулууспата.