Сылгыны иитиигэ аналлаах научнай-практическай конференция буолан ааста

Бүгүн Дьокуускайга «Сылгыны үөрдээн иитии: бэҕэһээ, бүгүн, сарсын» Бүтүн Арассыйатааҕы научнай-практическай конференция буолан ааста.

Сылгыны иитиини наука хараҕынан көрөр, уопут атастаһар киэҥ хабааннаах тэрээһиҥҥэ Татарстан, Башкортостан, Бурятия, Иркутскай уонна Рязанскай уобаластар, Москва, Казахстан учуонайдара, исписэлиистэрэ, Арассыыйа бөдөҥ научнай-чинчийэр институттарын уонна Саха сирин хаһаайыстыбаларын бэрэстэбиитэллэрэ кыттыыны ыллылар. 
Өрөспүүбүлүкэ тыатын хаһаайыстыбатын миниистирэ Артем Александров бэлиэтээбитинэн, ыраас хааннаах сылгыны ылыыга, сылгы баазалары тутууга үлэ салҕаныахтаах, саха боруодатынан дьарыктанар үс бөдөҥ сылгы собуотугар ураты усулуобуйа тэриллиэхтээх. «Кымыһы оҥорууга эмиэ былааннар бааллар. 2022 сыллаахха Саха сирэ биэ кымыһыттан аһытыллыбыт үүт бородууксуйатын оҥорорго аналлаах микроорганизмнар шаммнарын ылары ситиспитэ», – диэтэ миниистир. 
Конференцияҕа бэлиэтээбиттэринэн, ааспыт сылга Саха сиригэр сылгы ахсаана 178 тыһыынча төбөҕө тэҥнэспит буоллаҕына, 2024 сыл сэтинньи 21 күнүнээҕи чахчынан 232 тыһыынча төбө буолбут. 2017 сылтан саҕалаан 296 сылгы баазата тутуллубут, маныаха өрөспүүбүлүкэ бүддьүөтүттэн биир баазаҕа 1 мөлүйүөнтэн 3 мөл. солк. Диэри кээмэйдээх субсидия бэриллибит. 
Маннык уонна да атын хабааннаах өйөбүллэр түмүктэринэн, 2015 сылы кытта тэҥнээтэххэ, эти оҥорон таһаарыы иэнэ 10 тыһыынчаттан 12 тыһыынча туоннаҕа диэри үрдээбит. 2023 сыллаахха сылгыны үөрдээн иитиигэ судаарыстыбаннай өйөбүл кээмэйэ 607,3 мөл. солк. тэҥнэспит, ол иһигэр федеральнай бүддьүөттэн – 199,4 мөл. солк. киирбит, диэн иһитиннэрэр Ил Дархан уонна Бырабыыталыстыба пресс-сулууспата.