Убаҕас мыыла оҥостобут

Коронавирус дьаҥа тарҕаныаҕыттан илиибитин субу-субу суунабыт. Онон хайа да бэйэлээх мыыла өр турбат.

Маҕаһыыҥҥа суунар сириэстибэ эрэ элбэх. Оттон киһи бэйэтэ оҥорбут мыылата туох да буортута, ароматизатор эбилигэ суох. Оҥоһуллара бэрт судургу. Өссө маннык убаҕас мыыла быдан өр турар. Быыкаа куһуоктан элбэх убаҕас мыыланы оҥорон таһаарыахха сөп. Онон барыстаах өттүн толкуйдуур дьоҥҥо бэртээхэй сүбэ.

Эһиэхэ наада:

-мыыла куһуоччуга эбэтэр тобоҕо

-биир ыстакаан оргуйбут итии уу

- биир ньуоска мүөт

-биир ньуоска глицерин

- аҕыйах хааппыла эфирнэй арыы (бэйэҕит сөбүлүүргүтүнэн)

- ыстакаан үс гыммыттан бииригэр тымныы уу

- блендер.

1. Мыылаҕытын иһиккэ теркалааҥ уонна онно итии ууну кутуҥ. Блендеринэн ытыйыҥ.

2. Онно мүөт, глицерин уонна эфирнэй арыы эбиҥ. Өссө биирдэ ытыйыҥ.

3. 15 мүнүүтэ сойута ууруҥ, онтон тымныы уута эбиҥ уонна өссө төгүл блендердээҥ.

4. Убаҕас мыылаҕытын анал дозаторга кутуҥ. Суунарга бэлэм буолла. 

Илиигитин сууна сылдьыҥ! Бэйэҕитин, чугас дьоҥҥутун харыстааҥ!