«Туймаада ыһыаҕа-2023»: Туох саҥа баарый?

Олохтоох дьаһалта Култуураҕа уонна духуобунаска управлениетын салайааччыта Индира Ли «Россия 24» ханаалга Туймаада ыһыаҕын ыалдьыттарын туох ураты тэрээһин күүтэрин кэпсээтэ.
Ол курдук, Туймаада хочотун бэс ыйын 34-25 күннэригэр ыытыллар быйылгы Үрүҥ тунах ыһыаҕа Арассыыйаҕа Учуутал уонна уһуйааччы, Саха Өрөспүүбүлүкэтигэр Үлэ сылларыгар ананар уонна «Дьокуускай - килбиэннээх үлэ куората» девиһинэн ыытыллар.
Маны сэргэ, куорат баһылыга Евгений Григорьев быһаарыытынан анал байыаннай дьайыы кыттыылаахтарыгар ананар. Ол эбэтэр куорат олохтоохторун уонна ыалдьыттарын мобильнай сыһыарыы QR-кодунан «Победа» пуондаҕа кылааттарын киллэрэргэ ыҥыраллар. Маны сэргэ Үс Хатыҥҥа ыһыах кэмигэр уу харчынан туттарар кыах баар буолуоҕа.
Икки күн усталаах-туоратыгар барыта 112 култуурунай, ол иһигэр 14 сиэр-туом тэрээһинэ, 19 араас куонкурус, ол иһигэр 4 фольклорга күрэх, 9 быыстапка, 6 оҕо күрэҕэ, 5 спорт күөн күрэһэ о.д.а. ыытыллаары турар.
Дьэ, быйыл аан бастаан ханнык ураты тэрээһиннэр ыытыллалларый?
1.Тыыннаахап аатынан ипподромҥа улуустар бэрэстэбиитэллэрэ симэхтээх сылгынан сэлэлии хаамыахтара. 
2.Саха уһаайбатын ураһатыгар Национальнай уус-уран музей быыстапката тэриллиэҕэ.
3.Саха уһаайбатын балаҕаныгар 19-с үйэтээҕи олоҕу-дьаһаҕы кэрэһилиир быыстапка күүтэр.
4.«Театральнай» диэн саҥа 13 №-дээх түһүлгэҕэ Августина Филиппова 75 сааһынан дизайнердар күрэхтэрэ ыытыллар. Күрэх кэнниттэн алта улуустан кэлбит норуот тыйаатырдарын испэктээктэрэ туруоҕа.
Саҥа тутуулар
1.Кэккэ түһүлгэлэргэ саҥа олорор сирдэр күүтэллэр.
2.Күнү көрсүү сиэрэ-туома ыытыллар түһүлгэтигэр икки туос ураһалаах саҥа балаһаакка тутуллар.
Тэрээһиҥҥэ саҥаны киллэриилэр
1.Үс Хатыҥ каартата интэриниэккэ киирдэ. Ол эбэтэр 2ГИС сыһыарыынан ыһыах бары балаһааккаларын көрүөххэ сөп. 
2.Түөрт информационнай пууҥҥа ыйанар QR-код көмөтүнэн Wi-Fi холбонуохха сөп.
Маны сэргэ Үс Хатыҥҥа Медицина национальнай кииниттэн уонна Автовокзалтан икки маршрутнай оптуобус сылдьар. Бырайыас сыаната 50 солкуобай.
Балаакканан түһэн ыһыахтааччыларга 2 тыһыынча миэстэ тыырыллан турар. 
Ыһыахчыттарга ирдэбиллэр
Ыһыах дьонугар анаан 150 эргиэн туочуката үлэлиэҕэ, ол иһигэр 80 хорчуоппа баар буолуоҕа. Онон көҥүлэ суох атыы кытаанахтык бобуллар. Маны сэргэ арыгылаах утаҕынан эргинии кытаанахтык бобуллар. 
Ыһыах ыраахтан кэлэр маанылаах ыалдьыттарынан Кытай, Хабаровскай кыраай, Улан-Удэ бэрэстэбиитэллэрэ буолуохтара.
Оттон ыһыах быһа эпиирин ГТРК "Саха" https://gtrksakha.ru/, ">  ссылканан көрүөххэ сөп.