Тулагы бэтэрээннэрэ Улуу Кыайыы 78 сылын көрсө

Тулагы бөһүөлэгэр үгэс буолбут «Бэтэрээн күнэ” аахсыйа буолан ааста. 
Тэрийээччилэр – Дьокуускай куораттааҕы Үлэ уонна социальнай харалта управлениета, Дьокуускай куорат бэтэрээннэрин сэбиэтэ, «Бэтэрээн» кулууп, РФ Саха Өрөспүүбүлүкэтигэр социальнай пуондата, СӨ Доруобуйаларынан хаарчахтаах дьону комплекснай реабилитация социальнай-чэбдигирдэр киинэ уонна «Забота-Арчы» хаһыат.
Дьокуускай куораттааҕы Үлэ уонна социальнай харалта управлениетын начаалынньыга Семен Матвеев тыыл уонна үлэ бэтэрээннэрин, анал байыаннай эпэрээссийэ кыттыылаахтарын дьиэ кэргэттэрин социальнай өйөбүл миэрэлэрин уонна уонна буолаары турар Кыайыы күнүн бырагырааматын кытта билиһиннэрдэ.
Саха Өрөспүүбүлүкэтигэр Арассыыйа социальнай пуондатын бэрэстэбиитэлэ Василий Тихонов биэнсийэни индексациялааһын, үлэлээбэт биэнсийэлээхтэргэ айан ороскуотун толуйуу, үлэлээбэт гражданнары дьиэҕэ көрүүгэ көмө харчы о.д.а. туһунан ыйытыыларга хоруйдаата. 
«Бэтэрээн» кулууп бэрэссэдээтэлэ Ирина Соловьева ыччаты патриотическай иитии, бэтэрээннэргэ култуурунай сынньалаҥ туһунан иһитиннэриини оҥордо.
СӨ Доруобуйаларынан хаарчахтаах дьону комплекснай реабилитациялааһын социальнай-чэбдигирдэр киинин бэрэстэбиитэлэ Дария Яковлева Киин үлэтин уонна манна киирэн чэбдигирии туһунан билиһиннэрдэ. 
«Забота-Арчы» хаһыат сүрүн эрэдээктэрэ Василий Мандаров хаһыат нэһилиэнньэ ханнык араҥатыгар ананарын, туох матырыйаал тахсарын билиһиннэрдэ уонна сыл иккис аҥаарыгар сурутууну ыытта. 
Оттон Тулагы бэтэрээннэрин долгутар кыһалҕалар – быраастарга көрдөрүү, оптуобус тохтобулун сөптөөх сиргэ көһөрүү, көҥүлэ суох сөтүөлүүр сир кыһалҕата. 
Бэтэрээн күнүн Станислав Олесов салайааччылаах А.Д. Макарова аатынан Дьокуускайдааҕы култуура уонна искусство коллеһын устудьуоннара киэргэттилэр. 
Түмүккэ Семен Матвеев бэтэрээннэргэ уонна анал байыаннай эпэрээссийэ кыттыылаахтарын дьиэ кэргэттэригэр өйдөбүнньүк бэлэхтэри туттарда, диэн Дьокуускай куораттааҕы Үлэ уонна социальнай харалта управлениета иһитиннэрэр.