Тротуары күрдьэҕинэн ыраастыыгыт? Сайсарылар – тиэхиньикэнэн!

Дьокуускай куорат Сайсары управата тротуарга уонна суол кытыытыгар дьапталҕаланар хаары көйөн ыраастыыр анал тиэхиньикэлэммит. 

Управа исписэлииһэ Алексей Явловскай иһитиннэрбитинэн, билиҥҥитэ, эксперимент быһыытынан, биир эрэ «тротуар ледоколун» атыыласпыттар. 

«Быйылгы курдук элбэх уонна ирэ-ирэ тоҥон чигди буолар хаардаах дьылга, чахчы, олус наадалаах тэрил диэн сыаналаатыбыт. Саҥа тиэхиньикэ сүрүн биһирэмнээх өрүтүнэн тротуар уонна аспаал бүрүөһүнүн алдьаппата буолар», – диир Алексей Явловскай.
Оттон чуолаан маннык, муус чигдигэ кубулуйбут хаары кытта «охсуһар» үлэһит Роман Новгородов: «Өскөтүн урут наар илиибитинэн көйөн күнү-күннүктээн ыраастыыр буоллахпытына, бу тэрил дьапталҕаламмыт хаары бэрт түргэнник алдьатар эбит», – диэн биһирээбитин биллэрэр.
Онон Сайсары управата, бука, маннык тиэхиньикэни эбии атыылаһара, атыттар даҕаны үтүктэллэрэ буолуо.