26.08.2022 | 10:00

Тиэргэни тупсарыы үлэтэ хайдах баран иһэрий?

Тиэргэни тупсарыы үлэтэ хайдах баран иһэрий?
Ааптар: Айталина Софронова
Бөлөххө киир

«Уһук Илиҥҥэ – 1000 тиэргэн» федеральнай бырайыагынан Дьокуускай куоракка быйыл 75 тиэргэн тупсаран оҥоһуллар. Бу туһунан хаһыаппытыгар тиһигин быспакка сырдатабыт. Бу сырыыга нэһилиэнньэ санаатын истээри, Курашов уулуссатын 27, 27/1, 27/2, 29, 29/2 элбэх кыбартыыралаах дьиэлэр тиэргэннэрин көрдүбүт, үлэ хаамыытын билистибит.

Ньургустаан Семенов, «Север-Строй” салайар хампаанньа маастара:

Билигин Курашов уулуссатын 27, 27/1, 27/2, 29, 29/2 элбэх кыбартыыралаах дьиэлэрин тиэргэннэригэр демонтаж бара турар. Саҥа бордюрдары, тротуардары уурабыт, ол кэннэ аспаал кутуллуоҕа уонна оҕо балаһааккатын оҥоруохпут. Билиҥҥитэ биир балаһаакка буора кутуллан турар. Үлэ барыта алтынньы 31 күнүгэр диэри бүтүөхтээх. Болдьохтон хаалыы суох, барыта график быһыытынан бара турар.

Екатерина Горосюк, «2003” ТСЖ бэрэссэдээтэлэ:

Үлэ олох соторутааҕыта саҕаламмыта. Сорох үлэни тута миэстэтигэр быһаарабыт. Түмүгэр туох тахсыахтааҕын билбэппит, бырайыагы олохтоохтор бигэргэппэтэхпит. Үлэһиттэри уонна салайар хампаанньаны кытта уопсай тылы буллубут. Бэдэрээтчитинэн «Основа” ХЭТ үлэлиир.

Үлэ чахчы алтынньы 31-гэр диэри бүтүө дуо, олохтоохтор саарбахтыыллар эбит?

Оннук! Саарбахтааһын баар. Ол эрээри үлэ тэтимнээхтик барар диэн бэлиэтиир тоҕоостоох. Дьон үксэ аспаалы хаар үрдүнэн ууруохтара диэн сэрэхэдьийэр.

 

Олохтоохтор санаалара:

Николай:

Үлэ бара турар эрээри, өр баҕайы оҥороллор эбит. Бордюрдарын сыыһа оҥорон быһыылаах, биир нэдиэлэни быһа көннөрдүлэр. Билигин саҥаттан оҥоро сылдьаллар. Инньэ гынан бириэмэлэрэ уһаан-тэнийэн иһэрэ барыбытын ыгылытар. Ханнык тэрилтэ оҥорорун бу диэн чуолкайдаан билсибэтэҕим. Тымныылар номнуо түһэн эрэллэр, быйыл бүтэрдэллэр бэрт буолуо этэ...

Пелагея:

Үлэ барар, тохтоон турар диир кыаллыбат. Ол эрээри олус бытааннар. Харчылара кэлэн биэрбэт дуу, матырыйыыллара тиэллэн испэт дуу. Сүүс миэтэрэ кээмэйдээх уулуссаны үс ыйтан ордук оҥорон эрэллэр: бэс ыйа, от ыйа... этэҥҥэ балаҕан ыйыгар үктэнэн эрэбит.

Любовь:

Мин быйыл сүнньүнэн даачаҕа сайылаатым. Куораттааҕы кыбартыырабар кэлэ-бара сылдьабын. Үлэһиттэрэ манна уһун сайыны быһа сырыттылар. Ол эрээри, мин көрүүбэр, бытаан курдуктар, ыксатар эмиэ кыаллыбат курдук. Саамай сүрүнэ – хаачыстыбалаах эрэ буоллар ханнык.

Григорий:

— Хата, куорат салалтата болҕомто ууран, тиэргэммит тупсар суолга киирдэ. Үлэлии сылдьар дьону туох да диир кыаҕым суох, үлэ күн аайы бара турар курдук, күн ахсын үлэһиттэр бааллар. Олох үлэлээбэттэр, сыталлар диир сатаммат буоллаҕа. Хаар түһүөр диэри бүтэрэллэр ини диэн эрэх-турах санаалаахпыт. Уонна, оттон, оҥоһуллан эрдэҕэ дии, онтон биһиги, олохтоохтор, үөрэбит эрэ.

Розалия:

— Кытаатан хаар түһүөр диэри аспаалын кута охсуҥ. Онуоха-маныаха диэри ардах суох дииллэр ээ.

Аркадий:

Тиэргэммит дьэ тупсан эрэр, олорбуппут син ыраатта даҕаны. Хомойуох иһин, бырайыагы харахтаан көрө иликпин, баара дуу, суоҕа дуу, ким билэр. Саха сырайдаахтар манна үлэлээбэттэр, барыта кэлии дьон. Үрдүнэн-аннынан оҥороллоро да буолуо эрээри, суоҕунааҕар баара ордук. Ханнык хаһыаппын диэтиҥ?

«Киин куорат» хаһыат. Олохтоох дьаһалта үбүлээн таһаарар хаһыата.

Ээ, мээрбит хаһыата диэ. Дьэ, оччоҕо эдэр салайааччыга хаһыат нөҥүө махталбын тиэрдэбин! Чахчы, куорат сайдыытыгар, олоҕо тупсарыгар, суол да оҥоһуллуутугар кэнники кэмҥэ улахан болҕомто ууруллар буолла! Бу хайҕабыл! Бу эппиппин бэчээккэ таһаарар...

Бордюрдары ыраастыыллар, тэлгэтэллэр
Бу манна оҕо оонньуур балаһаакката оҥоһуллуохтаах, билигин хара буорунан көрөн турар
Подьезтан таҕыстахха, дьиэ иннэ барыта тутуу матырыйаала
Куорат хабыллар хаба ортотугар да олордоллор, суоллара суоҕа хомолтолоох. Арай, биһиги санаабытыгар, куорат кытыытытыгар эрэ 
оллур-боллур суоллар баалларын курдуга
Салайар хампаанньа үлэ хаамыытын хонтуруолга тутар
Араас кээмэйдээх щебенка муннук аайы кутуллан сытар
Дьиэлэр иннилэрэ барыта хаһыллан сытар
Кыра кээмэйдээх погрузчиктар үлэлииллэр
Олохтоохтор эһиилгиттэн көҕөрдүү үлэтин күүһүрдэр былааннаахтар

Сонуннар

Ордук ааҕаллар

Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...
Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
Элбэх оҕолоохторго — ураты болҕомто
Сонуннар | 06.06.2024 | 16:00
Элбэх оҕолоохторго — ураты болҕомто
2024 сыл ыам ыйын 28 күнүгэр ыытыллыбыт Ил Түмэн сэттис (уочараты таһынан) пленарнай мунньаҕар норуот дьокутааттара «Саха Өрөспүүбүлүкэтигэр элбэх оҕолоох ыал статуһун туһунан» өрөспүүбүлүкэ сокуонугар уларытыылары киллэриини өйөөтүлэр.   Санатан эттэххэ, дойду баһылыга Владимир Путин 2024 сыл тохсунньу ыйыгар элбэх оҕолоох дьиэ кэргэттэр статустарын болдьоҕо суох оҥорбута. Ол эбэтэр үс уонна...