Тэттик сонуннар

* Хакасия киин куоратыгар Абакаҥҥа ССРС үтүөлээх маастара Сергей Карамчаков кэриэһигэр түмүктэммит Бүтүн Арассыыйатааҕы көҥүл тустуу турнирыгар 57 кг Лев Павлов (Сунтаар), 65 кг Артем Слепцов (Чурапчы института) – кыһыл көмүс, 70 кг Иван Потапов (Чурапчы института), 125 кг Михаил Нестеров (ОЭУ) – үрүҥ көмүс, 74 кг Олег Фомин (Чурапчы института), 86 кг Борис Гаврильев (Дьокуускай) боруонса мэтээллэри ыллылар.

* Красноярскайга 21 диэри саастаах ыччаттарга бокса Бүтүн Арассыыйатааҕы турнирыгар Покровскай боксаҕа оскуолатын иитиллээччитэ Николай Пшенников 60 кг түөрт утарсааччытын баһыйталаан, бастакы миэстэни ылла. Бу иннинэ Николай Пшенников Новосибирскай куорат чөмпүйүөнэ буолбута уонна турнир бастыҥ боксерун аатын ылбыта.

* Хабаровскайга кыра саастаах оҕолорго хаҥкы спордугар “Сочитааҕы Олимп” девизтээх күрэхтэһиигэ Саха сирин хамаандата саастарынан икки бөлөххө иккиэннэригэр үһүс бириистээх миэстэлэри  ылаттаата. Ордук табыллан Дьокуускай куорат 10-с оскуолатын начаалынай кылааһыгар үөрэнэр Виталина Некрасова күрэхтэһэн, үс мэтээллэннэ, ол иһигэр 500 м дистанцияҕа хаҥкынан сүүрүүгэ – кыһыл көмүс мэтээл.

* Нам улууһун Хамаҕаттатыгар саха оҕунан ытыыга Аҕа дойду Улуу сэриитин бэтэрээнэ Николай Николаевич Москвитин бирииһигэр өрөспүүбүлүкэ таһымнаах турнирга «куобах», «кус», «тииҥ» көрүҥнэргэ 78 буолан күрэхтэстилэр. Бүлүү бэргэн охчуттара Клара Спиридонова уонна хапсаҕай, көҥүл тустуу, сахалыы остуол оонньууларын спордун маастара Андрей Захаров муҥутуур кыайыылаах үрдүк ааттарын ыллылар.