12.09.2021 | 11:00

Тапталлаах куораппыт, төрөөбүт күҥҥүнэн!

Тапталлаах куораппыт, төрөөбүт күҥҥүнэн!
Ааптар: Киин Куорат
Бөлөххө киир

Хотун Арылы Аллан кыыһа, СӨ култууратын туйгуна, ырыа-хоһоон айааччы, ырыаһыт:

Тапталлаах Сахабыт сирин тэбэр сүрэҕэ – долгуйар Дьокуускай куораппыт мааны күнүнэн сахалыы сайаҕастык эҕэрдэлиибин! Бу күҥҥэ нохтолоох сүрэҕим сырдык-чараас ырыа куттаах иэйиитинэн, сүргэм көтөҕүллэн, үөрэн-көтөн туран урааҥхайдыы уруйдуубун!

Өбүгэлэрбит саҕаттан саха омук сайдыыта буолбут Туймаада хочобут туонатыгар былыргы быдан дьыллартан аатырбыт кус быһый бөҕөстөрбүт, киппэ хааннаах боотурдарбыт, уос номоҕо буолбут, үһүйээҥҥэ кэпсэммит ырыаһыт-тойуксут дьоммут, инники күөҥҥэ сылдьар улуу убайдарбыт, ытык суруйааччыларбыт ааттара, ыччаттара  өрүү  сайда-үүнэ турдуннар! Дьоллоох түгэнинэн, сахам дьоно! Уруй! Айхал! Мичил!

Александр Дьячковскай-Ырыа Саарын, СӨ үтүөлээх артыыһа:

Дьокуускай куораппын ис сүрэхпиттэн эҕэрдэлиибин! Мин Дубай курдук куораттаныахпын баҕарабын. Тоҕо диэтэххэ, биһиэхэ элбэх сиртэн хостонор баай баар. Ол баайы куораппыт сайдыытыгар угаллара буоллар, манна даҕаны олох таһыма үрдүө, сайдыы баар буолуо этэ. Ол да эрээри, сыыр намыһаҕынан эттэххэ, Алтаай эбэтэр Бурятия курдук чэчирии турарбыт буоллар. Аны Дьокуускай куораппытын Арассыыйа киинэ оҥороору гыналлар диэн этэллэр дии. Эмиэ куттаныы. Чэ, ол да буоллар Дьокуускай өссө күүскэ сайда, үүнэ турарыгар баҕарабын.

Лиза Васильева,  “Саха” НКИХ “Сонуннар” биэриитин ыытааччыта:

Киэҥ нэлэмэн Сахабыт сирин киинин – дьоллоох Дьокуускай куораты төрөөбүт күнүнэн эҕэрдэлиибин! Мин Дьокуускайы наһаа таптыыбын, урут оҕо сылдьан хаһан улаата охсон куоракка олорор буолабын дии саныырым. Билигин бэйэм киин куоракка олорбутум хайыы-үйэ уонча сыл буолла.   

Тапталлаах куораппар баҕарыам этэ көнө суолу, күөх маһы, үгүс үүнээйини. Киэҥ парковкалар, сквердэр, пааркалар тутуллалларын ыралыыбын. Дьон-сэргэ култууратын таһыма үрдүүрүгэр, элбэх интэриэһинэй сирдэр тэриллиэхтэригэр, куруук күөх халлаан турарыгар бүк эрэнэбин

 

Татьяна Чаранская, Эстрада театрын салайааччыта:

Тапталлаах Дьокуускай куораппын төрөөбүт күнүнэн истиҥник эҕэрдэлиибин! Хас күн ахсын түннүкпүн арыйан, куораппын көрөн махтанабын - кини миэхэ олохпун, оҕолорбун, сиэннэрбин, сөбүлүүр үлэбин бэлэхтээбитэ. Дьокуускайым барахсан маннык сайда, үүнэ турара көрүөххэ кэрэ, киһи сүргэтин көтөҕөр, сүрэҕин долгутар. Биһиги, Эстрада театрын үлэһиттэрэ, ырыабытыгар эйигин туойабыт, хоһооммутугар хоһуйабыт, куораппыт киэркэйэрин туһугар үлэлиибит- хамсыыбыт.

Айхал Габышев, Саха сирин Аҕаларын түмсүүтүн бэрэссэдээтэлэ, Саха сирин тутааччыларын түмсүүтүн салайааччыта:

Көрсүө дьонноох, саҥа тутуулардаах, күөстүү оргуйар олохтоох тапталлаах куоратым, өрүү дьоллоох буол, үйэлэр тухары үүнэ-сайда тур!

Дьоллоох Дьокуускай куорат олохтоохторун уонна ыалдьыттарын куораппыт төрөөбүт күнүнэн ис сүрэхтэн эҕэрдэлиибин!

Таптыыр Сахабыт сирин киин куората төрүттэммитэ төрдүс үйэтигэр чугаһаата. Бу сыллар тухары сүүһүнэн омук буолан,  бэйэ-бэйэбитигэр эйэ дэмнээхтик сыһыаннаһан, биир санаанан салайтаран дьоллоохтук олорон кэллибит. Ол тухары куораппыт тэтимнээхтик сайдан иһэрэ хас биирдии киһи сүргэтин көтөҕөр. Дьон-сэргэ олохсуйарыгар куорат олоҕо күннэтэ тупсан иһэрэ харахха арылхайдык быраҕыллар. Өссө да сайдыа турдаҕа мааны куораппыт, өссө да түмсүүлээх буолуохпут турдаҕа куорат олохтоохторо! Хас биирдии киһиэхэ элбэх ситиһиини, сиэрдээх майгыны, кырдьыгы өрө тутууну, ыраас тапталы уонна иллээх олоҕу баҕарабын!

Саргылана Савватеева, “Сахаэнерго” пресс-сулууспатын үлэһитэ:

– Мин Дьокуускай куоракка төрөөбүтүм, национальнай гимназияны үөрэнэн бүтэрбитим, СГУ суруналыыстыка салаатыгар уһуйуллубутум, билигин идэбинэн  үлэлии-хамсыы сылдьабын. Куораппыт үүнэн-сайдан иһиэн баҕарабын. Саҥа дьиэлэр дьэндэйэн истиннэр, үөрэх кыһалара арыллан, оҕолору, эдэр ыччаты кэрэҕэ, үтүөҕэ сирдээтиннэр. Дьиэлэрбит куруук сылаас, сырдык буоллуннар. Бу сайын баһаартан сылтаан куораппыт хара буруонан бүрүллэн турбута олус хомолтолоох этэ. Аны хаһан да маннык күннэр хатыламматыннар. Үрдүк мэҥэ халлааммыт, тыынар салгыммыт, тулалыыр эйгэбит ыраас буоллуннар!

Мирослав Бочкарев, Москва куоракка inDriver хампаанньа digital-маркетолога:

— Төһө да дойдубуттан ыраах сырыттарбын, олордорбун син биир эдэр сааһым ааспыт куоратын олус истиҥник ахтабын уонна суохтуубун!

Куораппар баҕарыам этэ өрүү маннык курдук чэчирии, киэркэйэ турарыгар! Олус элбэх эдэр ыччаты сырдыкка, кэрэҕэ угуйарыгар!

Суохтуубун, ахтабын! Төрөөбүт күҥҥүнэн, тапталлаах Дьокуускай куоратым!

Виктория Оленова, маассабай тэрээһиннэр режиссера:

— Мин бу куоракка киһи быһыытынан бэйэбин сайыннардым, үөрэх ыллым, таптыыр идэбин толору баһылаатым, дьиэ кэргэммин тэринним.

Дьокуускай куорат хас биирдии киһи тус баҕа санаатын олоххо киллэрэригэр олус сүҥкэн суолталаах. Төһө даҕаны тымныы, тыйыс сиргэ олордорбут, биһиги куораппытыгар олох чэчирии устар, сайдыы балысхана түргэнник кэлэр.

Туохха барытыгар болҕомтолоох буолуоҕуҥ, айылҕабытын харыстыаҕыҥ, куораппытыгар ыраастык сыһыаннаһыаҕыҥ. Төрөөбүт куораппытын таптыахха!

Елена Аммосова, куорат тупсарыгар бэйэтин кылаатын киллэрэр блогер:

— Тус бэйэбэр куоратым олус элбэҕи биэрдэ. Манна бастыҥ доҕотторбун, тапталбын көрсүбүтүм, үөрэхпин бүтэрбитим.

Дьокуускай олус түргэнник уларыйар. Ол аата 90-с, 2000 сыллары уонна билиҥҥини тэҥнээн көрдөххө, үс араас «куорат” диэн өйдөбүл баар. Дьокуускайбыт дьүһүнүнэн эрэ буолбакка, ис эйгэтэ эмиэ тупсар. Нэһилиэнньэтин майгыта-сигилитэ, олоҕу көрүүтэ уларыйар.

Мин киин куораппар чэчирии сайдыыны уонна этэҥҥэ буолууну баҕарабын!

Егор Филиппов, “Дыгын оонньууларын” биэс төгүллээх кыайыылааҕа:

— Олох төһө даҕаны уста турбутун иһин, куорат сайдыыта, мин санаабар, инники күөҥҥэ тахсыахтаах. Олох-дьаһах кыһалҕаларын кытта тэҥҥэ инфраструктура, суол-иис кыһалҕалара хас биирдии куорат олохтооҕун долгутар. Биллэн турар, баар кыһалҕалар ыллыҥ да, биирдэ быһаарыллыбаттара  чахчы. Ол эрээри үүнүү-сайдыы, дьон олороругар табыгастаах куорат буоларыгар ирдэбил былаанынан туолан иһэллэригэр баҕарабын. Дьэ, оччоҕо олохтоох саха киһитэ, ыччата, кэлэр кэнчээритэ төрөөбүт сиригэр-уотугар үлэлиэ-хамсыа, быр-бааччы нус-хас олохтонон олоруо.

Туймаадабыт хочото чэчирии сайдарыгар, куорат бары олохтоохторугар чэгиэн-чэбдик доруобуйаны, дьолу-соргуну баҕарабын! Ытыктабыл уонна өйөбүл  куорат уопсастыбатын бөҕөргөтүүгэ тирэх буоллун, оччоҕо ханнык баҕарар сорукпут  ситиһиилээх буолуоҕа!

Алеся Сосина, СӨ ыччатын политикатын туйгуна:

— Тапталлаах куораппын төрөөбүт күнүнэн ис сүрэхпиттэн эҕэрдэлиибин. Бу курдук сайда, үүнэ-чэчирии турарыгар баҕарабын. Элбэх чаҕылхай, инникигэ эрэллээх, сайдам санаалаах эдэр ыччаттаныан баҕарарбын. Саҥа, үрдүк таһымнаах баараҕай бырайыактар үлэҕэ киирэллэригэр туруулаһыах. Аҕа саастаах ытык дьоммутун ытыс үрдүгэр илдьэ сылдьан, киинэлэри таҥан, кинилэр тустарынан кинигэ суруйан таһаарарбыт буоллар диэн баҕа санаалаахпын. Кинилэр баай уопуттарын, киэҥ билиилэрин биһиэхэ, эдэр дьоҥҥо, тиэрдэллэригэр баҕарабын. Бу куоракка санаабыппыт сатаннын, баҕарбыппыт туоллун, толору дьоллоох буолуҥ!

Нюргуяна Сыроватская, ыытааччы:

– Киин куораппыт төрөөбүт күнүнэн барыгытын эҕэрдэлиибин! Хомойуох иһин, куорат күнүн бэлиэтиир тэрээһиннэр икки сыл пандемиянан сибээстээн киэҥ далааһыннаахтык ыытыллыбаттар. Ол гынан баран, санаабытын түһэрбэппит, куруук сырдыкка, кэрэҕэ эрэ дьулуһуохха. Хаһан эрэ бу аан дойдуну тилийэ тарҕаммыт ыарыыбыт ааһар ини диэн эрэнэбин.

Киһи хаһан баҕарар охтон баран турар, силлиэ кэнниттэн чуумпу кэлэр, хараҥа кэнниттэн сырдык тахсар. Онон ханнык баҕарар түгэҥҥэ санаабытын түһэрбэккэ иннибит диэки эрдэн, айаннаан иһиэххэ. Ыалдьымаҥ, доруобай буолуҥ! Куораппыт сайдарын туһугар үүнэн, үлэлээн иһиэххэ.

Сонуннар

Ордук ааҕаллар

Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
“Сүүрэр суолга – Владимир Слепцов!”
Спорт | 18.06.2024 | 14:15
“Сүүрэр суолга – Владимир Слепцов!”
Спорт көрүҥнэриттэн биир бастыҥнара уһун сиргэ сүүрүү. Ырааҕы сүүрүүнэн ылбычча киһи дьарыктаммат. Бэйэтин кэмин аатырбыт сүүрүгэ-быһыйа, Саха АССР рекордсмена, стайер уонна марафонец Владимир Слепцову ааспыт үйэ 60-80 сылларын дьоно үчүгэйдик өйдүүр-билэр. Быйыл рекорд олохтообута лоп-курдук 50 сыла. Аҕаларын, эһэлэрин кэриэстээннэр оҕолоро, сиэннэрэ, бииргэ төрөөбүт балта  Людмила Пантелеймоновна, быраата Артем Пантелеймонович...
ЭкоБизнес —  Айылҕаҕа харыстабыллаах  сыһыаҥҥа тирэҕирэн
Дьон | 14.06.2024 | 14:00
ЭкоБизнес — Айылҕаҕа харыстабыллаах сыһыаҥҥа тирэҕирэн
Дьокуускайга бизнес араас хайысхата сайдар. Олохтоох бородууксуйаны оҥорон атыыга таһаарыы ордук элбэх эбит буоллаҕына, туризм курдук өҥөнү оҥорор предпринимателлэр тарбахха баттаналлар. Юлиана уонна Захар Алексеевтар элбэх оҕолоох дьиэ кэргэн Дьокуускай таһынааҕы Капитоновка сэлиэнньэтигэр туристическай бизнеһи сайыннаран эрэллэр.   Оҕолор улааттылар диэн саҕалаабыппыт – Биһиги үс уоллаахпыт. Улахаттарбыт 14 саастарын туолбуттарын кэннэ,...
Олоҥхо ыһыаҕар анаан Дьокуускайтан айанныыр паром ахсаана элбэтиллэр
Сонуннар | 14.06.2024 | 10:17
Олоҥхо ыһыаҕар анаан Дьокуускайтан айанныыр паром ахсаана элбэтиллэр
XVII-с өрөспүүбүлүкэтээҕи Олоҥхо ыһыаҕа быйыл бэс ыйын 20-21 күннэригэр Аммаҕа Муона чараҥа айылҕа маанылаах миэстэтигэр ыытыллаары турар.  Ыһыах мааны ыалдьыттарынан өрөспүүбүлүкэ 32 муниципальнай тэриллиититтэн 15 тыһыынчаттан тахса киһи буолуоҕа. Айанньыттарга анаан «Дьокуускай – Аллараа Бэстээх» хайысханан 15 паром сылдьыаҕа, Амма сэлиэнньэтин иһинэн оптуобустар, ыһыах түһүлгэтигэр тиэрдэр шатллар сүүрүөхтэрэ. Түһүлгэҕэ 3...